خبر ترکی:
یادگارین چمنی حاقدا آجی بیر گئرچک
کئچن هفته دوغو آذربایجانین گنج‌لر و ورزش قورومونون باشچی‌سی جانلی یایین‌دا یادگار استادیومونون چمنین دورومو حاقدا بئله دئییب:« چمن ایکی آی سونرا ایده‌آل دوروما چاتماسا شهرین مئیدانین منی جزالاندیرین». آنجاق یادگارین سون دوروموندان یایینلان شکیل‌لر اونون سؤزلرینی تصدیق‌له‌مه‌ییر. تراکتور-پرسپولیس یاریشماسی‌نین ائرتلنمه‌سی اونون نفعینه اولموش‌دور. اَلده ائتدییمیز بیلگی‌لره گؤره اوچ گون اؤنجه استادیوما یئنی‌دن توخوم سپیلیب. هیبریدی چمن دؤرد آشامادا اَکیلمه‌لی‌دیر. اوچ آی بوندان سونرا چمن ایده‌آل دوروما چاتمالی‌دیر. بونلارا رغمن بیر آی چمن اَکمه‌دن سونرا تراکتور-الوحده اویونو یادگاردا کئچیریلمیش. او زامان چمن یئترینجه بیتمه‌میش‌ایدی. الشرطه-تراکتور یاریشماسیندا چمنی چور وورموش‌ایدی. تبریزده یاز ایله یای آی‌لاریندا چمنین بیتمک زامانی‌دیر. آنجاق آذربایجانین ورزش سوروملو‌لاری بو فورصتی اَلدن وئرمیش‌لر.
آزمون‌لا بیرونون جوتلویو تراکتوردا
سردار آزمون مصدوم اولدوغو اوچون نوامبر آیی‌نین فیفادی اویون‌لارینا قاتیلماییب. یوخاری احتمال ایله میللی تیمین سونراکی اوردوسوندا (مارس آییندا) دونیا کاپی‌نین یاریشمالاری اوچون حاضیرلاناجاق. او بو دفعه دونیا کاپ‌یندا قول ووراراق طلسم سیندیرابیلر. سردار آزمون داها گنج اولدوغو زامان‌لار استقلال ایله پرسپولیس تیم‌لرینین مشق‌لرینه قوشولموش‌دور. بو مسئله بیر چوخ حاشیه یاراتمیش‌دیر. آنجاق او سون زامان‌لار تراکتورا قوشولماق اوچون ماراقلی‌دیر. او گله‌جک‌ده تراکتورا قوشولماق ایسته‌دیینی بیلدیرمیش‌دیر. آزمون ایرانا قاییتدیغی زامان تکجه تراکتوردا توپ اوچون توپ اویناماق ایسته‌ییر. تورکمن اوغلو بو سؤزلری تصدیق‌له‌‌یه‌رک بئله دئییب:« ایرانا گلمک ایسته‌دییم زامان تراکتوردا اویناماغی چوخ سئویرم. بونونلا باغلی سورونوز وار؟»
بیرو آزمون‌دان نه زامان تراکتورا گله‌جه‌یی‌نی سوردوغو زامان او شوخلوق‌لا بئله دئیب:« سن ایسته‌دیین زامان! آنجاق من تراکتورا گلدییم گون سن اوردا اولما.»
اردبیل-تبریزین یوز میلیاردلیق آلیش-وئریشی
مس‌سونگون فوتبال تیمی‌نین امتیازینین ساتیشی چوخ دانیشیلان قونولاردان‌دیر. باشگاه یاخین قایناق‌لاردان گلن خبرلره گؤره سونگونون امتیازی اردبیله ساتیلاجاق‌دیر. بو خبر رسمی شکیلده تصدیق‌لنمه‌ییب. آنجاق اَلده ائتدییمیز بیلگی‌لره گؤره مس‌سونگون یوز میلیاردین قارشیسیندا اردبیله تاپشیریلمیش. فصلین سونوندا بو خبر رسمی شکیلده یایینلاناجاق. آنجاق دوغو آذربایجانین گنج‌لر و ورزش قورومو هابئله فوتبال هئیتی سونگونون سهمیه‌سی‌نین باشقا شهره وئریلمه‌سینی ایسته‌مه‌ییرلر. اونلار بو سهمیه‌نی دوغو آذربایجان‌دا ساخلاماق ایسته‌ییرلر. مس سونگون فوتبال تیمی یئنی فصل‌ده چوخ چتین دوروم‌دادیر. اونلار سوپرلیگ جدولی‌نین سون سیرالاریندادیرلار.
یاریشما: رقابت، مسابقه
آشاما: مرحله
سوره‌ج: فرآیند
مشق: تمرین
سونوج: نتیجه
ایلک: اول
قارشیسیندا:روبرویش
دوروم: موقعیت
اؤنملی: مهم
اؤده‌مک: پرداخت کردن
ائتکی: تأثیر
مشقچی: مربی
نظرات (0)