خبر ترکی:
اسکوچیچین یئنی هافبکی وار!
سون هفتهلرده تراکتورون اؤنملی اویونچولاریندان بیر نئچهسی مصدوم اولوبلار. ایقور پوستونسکی آسیا هابئله سوپرلیگ یاریشمالارینی اَلدن وئریب. آنجاق بو چتین دورومدا مهدی حسینی ساغالاراق تراکتورا قاییدیب. مهدی حسینی سون دفعه کئچن ایل آسیا داهیلر لیگاسیندا بحرینین الخادیه تیمینین قارشیسیندا مئیدانا گئدیب. اوندان سونرا مصدوم اولدوغو اوچون بو گونه قدر یاریش مئیدانیندان اوزاق دوشوب. بو اویونچو کئچمیشده آلومینیوم هابئله مس رفسنجان تیملرینده چالیشیب. سون ایکی ایلده ده تراکتور باشگاهینین اویونچوسو ساییلیر. ایندی ایسه اوزون موددتدن سونرا تیمین مشقلرینه قاییدیب. دراقان اسکوچیچین ایستهدییی زامان او مئیدانا گئدهجکدیر. حسینینین دیزینین چارپاز باغلاری قیریلمیشدیر. او اوزدن دوققوز آی مشقلردن هابئله اویونلاردان کنار دورموشدور. تراکتورون مشقلریندن یایینلانان شکیللرده اونون یاخشیجا ساغالدیغی بللیدیر.
شارجه تراکتوردان سونرا گون گؤرمهدی
اماراتین شارجه تیمی کئچن ایل آسیا داهیلر لیگاسینین ایکینجی سویهسینده قهرمان اولموشدور. آنجاق یئنی فصلده یاخشی سونوجلار اَلده ائتمهمیشلر. اونلار امارات لیگاسیندا یئددی اویوندان دؤرد اویونون اودوزوبلار. شارجه آسیا یاریشمالارینین ایکینجی هفتهسینده السدین قارشیسیندا بیر-بیره اویونو مساوی ائتمیشدیر. آنجاق تراکتورا اودوزدوقدان سونرا اونلارین دورومو داها پیس اولوب. شارجه بئش-هئچه تراکتورا اودوزدوقدان سونرا امارات لیگاسیندا اوچ یاریشمانی دال با دال اودوزوب.اونلار اؤز ائولرینده ده العینی اودا بیلمهییبلر. شارجه تراکتورا اودوزدوقدان سونرا اماراتین جمهور باشقانین لیگاسیندا دا بیرینجی سویهده چالیشان بیر تیمه اودوزموشدور. کئچن آخشام داهیلر لیگاسینین دؤردونجو هفتهسینده ده عربستانین الاتحاد تیمینه اودوزموشلار. اونلار بو سونوجلارلا داهیلر لیگاسینین قالان یاریشمالارینی دا اَلدن وئرهجکلر.
تراکتور نسفین طلسمین سیندیرمالیدیر
آسیا داهیلر لیگاسینین بئشینجی هفتهسینده تراکتور دوشنبه گونو قارشی شهرینده نسف تیمینه قوناق اولاجاقدیر. بو یاریشما ایکی یاندان تراکتور اوچون اؤنملیدیر. ایکی تیمین اَسکی یاریشمالارینی آراشدیردیغیمیزدا تراکتور دوققوز ایل اؤنجه آسیا یاریشمالاریندا ایکی-بیره اویونو اودوزوب. تراکتور بو گونه قدر اوزبکلری اودا بیلمهییب. بوندان علاوه آسیا یاریشمالارینین یئنی فصلینده نسف قارشی هئچ بیر تیمه اودوزماییب. او اوزدن تراکتورون ایشی بو تیمین قارشیسیندا چتیندیر. اسکوچیچین اویونچولاری بو اویوندا ایکی آماجلا مئیدانا گئدهجکلر:
ایلک دفعه اولاراق نسف تیمین اودمالیدیرلار هابئله اونلارین اودوزمامازلیق طلسملرینی سیندیرمالیدیرلار.
یاریشما: رقابت، مسابقه
آشاما: مرحله
سورهج: فرآیند
مشق: تمرین
سونوج: نتیجه
ایلک: اول
قارشیسیندا:روبرویش
دوروم: موقعیت
اؤنملی: مهم
اؤدهمک: پرداخت کردن
ائتکی: تأثیر
مشقچی: مربی
نظرات (0)