خبر ترکی:
دوخسانین اویون‌لاری هوادارسیز اولاجاق!
باتی آذربایجانین سوروملولارینین توتومونا گؤره دوخسانین اویون‌لاری بیر سونراکی بیلدیری‌یه قدر طرفدارسیز کئچیریلمه‌لی‌دیر. بهانه‌لری ایسه باکری استادیومونون یئترسیزلییی‌دیر. آنجاق یای فصلینده یوخاری هزینه ایله بو ورزشگاه‌ین اسکیک‌لیک‌لری آرادان قالدیریلمیش‌دیر. یئنی فصل‌ده ده لیگ قورومونون تأییدی ایله دوخسان بو استادیوم‌دا بیر نئچه حریفیندن میزبانلیق ائتمیش‌دیر. دوخسان یئنی فصل‌ده فرقلی سورون‌لارلا اوز-اوزه اولدوغونا رغمن تماشاچی باخیمیدان آزادگان لیگاسیندا بیرینجی‌دیر اونلار بیرینجی سویه فوتبال لیگاسی‌نین اَن چوخ هواداری اولان تیم‌دیرلر. آنجاق باتی آذربایجانین سوروملولاری طرفدارلاری استادیوما گئتمک‌دن محروم ائتمیش‌لر. میزبانلیغین لغو اولونماسی فدراسیونونون بیلدیری‌سی ایله اولمالی‌دیر. آنجاق فدراسیون بو حاقدا هئچ بیر بیلدیری یایینلامامیش‌دیر.
هاشمی‌‌نژادین قیزیل فورصتی
مهدی هاشمی‌نژاد تراکتوردا دؤردونجو فصلینی کئچیرمک‌ده‌دیر. تراکتوردان اؤنجه ملوان‌لا نفت مسجدسلیمان تیم‌لرینده چالیشمیش‌دیر. کئچن ایکی فصل‌ده تبریزلی تیمین ترکیبینده پاریلدامیش‌‌دیر. او بو تیم‌ده اوچ فرقلی مشقچی ایله چالیشمیش‌دیر. قوربان بردییئف، پاکو خمس هابئله دراقان اسکوچیچ مهدی هاشمی‌نژادی تیمین تمل ترکیبینده اویناتمیش‌لار. سونون‌دا بو اویونچو اسکوچیچ دؤورونده میللی تیمه چاتمیش‌دیر. ایندی ایسه او میللی تیمین پارلاق اولدوزلاریندان‌دیر. امیر قلعه‌نویی ، میللی تیمین باش‌مشقچی‌سی ده اونا گووه‌نمیش‌دیر. او ۲۰۲۶ آمریکا یاریشمالاریندا دا تیمین ترکیبیندن اولابیلر. هاشمی‌نژاد بالاجا اولسا دا فیزیکسل باخیمدان گوجلودور. او بو گونه قدر بئش دفعه میللی‌نین اویون‌لارینا قاتیلمیش‌دیر. آنجاق مهدی العین اویون‌لاریندا ایلک قولونو ووراراق داها چوخ پاریلدایابیلر.
تراکتور ۱۱۰ میلیون جریمه ائدیلدی
انضباطی کمیته‌نین حؤکمونه گؤره تراکتورلا پرسپولیس‌ین اویون‌لاری سوپرلیگ‌ده هوادارسیز کئچیریلمه‌لی‌دیر. یئنی فصل‌ده اونلارین اویونو بنیان‌دیزل‌ده بیر-بیره باشاچاتمیش‌دیر. انضباطی کمیته‌نین حؤکمونه رغمن بیر نئچه هوادار استادیوما کئچمه‌یی باجارمیش‌دیرلار. اونلار اؤزل سکی‌لردن اویونو ایزله‌میش‌لر. هوادارلارین بو ایشی اویون سوروملولارینین گؤزوندن قاچمامیش. او اوزدن انضباطی کمیته‌نین حؤکمو ایله تراکتور باشگاهی یوز اون میلیون جریمه ائدیلمیش‌دیر. آنجاق تراکتور باشگاهی حذفی کاپ‌دا هوادارلاری‌لا بیرلیکده پرسپولیسی قارشیلایاجاق‌دیر.
یاریشما: رقابت، مسابقه
اویون: بازی
اویونچو: بازیکن
ائتکی: تأثیر
تپکی: واکنش
سونوج: نتیجه
یئنی: جدید
گووه‌نمک: اعتماد کردن
دستک: کمک، حمایت
کولتور: فرهنگ
بؤلوم: قسمت
ده‌یرلی: باارزش
سویه: سطح
دوروم: موقعیت
سیمگه: نماد، نشانه
نظرات (0)