خبر ترکی:
نسف قارشی گوجسوز حریف دئییل
تیراختورون سونراکی حریفی آسیا داهیلر لیگاسیندا نسف قارشی تیمیدیر. نسف قارشی اوزبکیستانین گوجلو هابئله اَسکی تیملریندندیر. کئچن فصل اونلار پاختاکورلا نوبهار کیمی گوجلو تیملرین قارشیسیندا پارلایاراق سوپرلیگادا بیرینجی اولموشلار. اونلار بو قهرمانلیقلا یئنیدن اوزبکیستان فوتبالیندا پارلامیشلار. بئلهلیکله اونلار آسیا یاریشمالارینین بیلیتین قازانمیشلار. آنجاق آسیا یاریشمالاریندا اونلارا چتین پوشک دوشموشدور. او اوزدن کئچن دؤرد اویونلارینی اودوزموشلار. بو سونوجلار اونلارین گوجسوز اولماسی دئمک دئییلدیر. نئچه هفته اؤنجه اوزبکیستان لیگاسیندا اونلار قهرمانلیغین ایلک آدایلاریندانایدیلار. اونلار ۵۶ امتیازلا بیرینجی سیرادا دایانمیشدیرلار. آنجاق ایندی فصلین سونونا یاخینلاشارکن نفتچی قهرمانلیغین ایلک آداییدیر.
والیبال لیگاسی آذربایجان نفعینه
بو گون ساعات ۱۶-دا آذربایجانین دؤرد تیمی بیرینجی سویه والیبال لیگاسیندا حریفلریله یاریشمیشلار. اونلار حریفلرینی اوداراق جمعه گونو آذربایجانین آدین باشاری ایله بویامیشلار. شبسترین ارسپر تیمی ایلک یاریشماسیندا اوچ میننفر هوادارلا آتیهسازان قم تیمین اودموشدور. اردبیلین مجتمع ملل تیمی شیرازدا پارسمهری اودموشدور. مسسونگون تیمی تبریزین والیبال ائوینده اوچ-بیره نفت تهرانسری اودموشدور. شهرداری تبریز تیمی ده تبریزین توانا سالونوندا تهرانین رعد پدافند تیمی ایله قارشیلاشمیشدیر. اونلار چتین بیر یاریشمادا اوچ-ایکی سونوجو ایله حریفلرینه قالیب گلمیشلر.
سونگونون سوپراستاری سسسیزلیک ایچینده
علیرضا افضل، محمدرضا سنگسفیدی ایله بهروز عظیمیدن سونرا ایندی فرهاد فخیم ایله سورونو واردیر. بو اویونچونون تیمین مشقلرینه قاتیلماق حقی یوخدور. افضل ایلک گونلرده فرهادین تیمه قاییتماسینی ایستهمهییردی. آنجاق فخیم سونگونون حساس یاریشمالاریندا اؤنملی رول اوینامیشدیر. باشگاهین رسمی رسانهسی کئچن هفته فرهاد فخیمین آیریلماسینی دانمیشدیر. آنجاق ایندی فخیم سسسیزلیک ایچینده سیلینمکدهدیر. سون اون ایلده بو اویونچو تیمین باشاریلاری اوچون بؤیوک آددیملار آتمیشدیر. افضلین سورونو سونگونون اولدوزلاریلا بیرینجیلیی تیمین اَلیندن چیخارتمیشدیر.
داهیلر لیگاسی: لیگ نخبگان
اَسکی: قدیمی
یئنی: جدید، تازه
ایلک: اول
آدای: کاندید
اؤنجه: قبل
سونوج: نتیجه
اویون: بازی
سویه: سطح
باشاری: موفقیت
سورون: مشکل
سون: آخر، پایان
نظرات (0)