خبر ترکی:
عالیشاه تبریزه گلمهیهجک!
پرسپولیسین بو گونکو مشقی امید عالیشاه اولمادان کئچیریلمیشدیر. او قیچینین همسترینگ ناحیهسیندن یارالانمیشدیر. او اوزدن ایکی اوچ هفته مئیدانلاردان اوزاق اولاجاقدیر. بئلهلیکله تیراختور-پرسپولیس یاریشماسیندا بو اویونچو اوینامایاجاقدیر. او کئچن یاریشمادا مصدوم اولدوغو اوچون یئرینی اورونوفا وئرمیشدیر. آنجاق عالیشاهین دوشونجهسینه گؤره جیددی بیر سورون یوخدور. گلن هفتهنین یاریشماسیندا دا مئیدانا گئتمک احتمالی یوخاریدیر. آنجاق آلدیغیمیز بیلگیلره گؤره بو اویونچو استقلال خوزستانین قارشیسیندا دا نیمکتده اوتوراجاقدیر.
اوسمارین سئودییی اویونچولار تیراختوردا!
تیراختور-پرسپولیس یاریشماسیندا اوسمار ویرا اوچ اَسکی اویونچوسو ایله ایلک دفعه اولاراق اوز-اوزه گلهجکدیر. سوپرلیگانین ۲۳-جو فصلینده علیرضا بیرانوند ، مهدی ترابی ، دانیال اسماعیلیفر پرسپولیسده اوسمارین رهبرلییی ایله اویون اویناییردیرلار. بیرانوند داروازادا، ترابی وینگر اولاراق اسماعیلیفر دفاع خطینین ساغ طرفینده پرسپولیسده چالیشیردیرلار. اونلار اوسمارلا قهرمانلیق عونوانینی دا قازانمیشدیرلار. اوسمار پرسپولیسدن آیریلدیقدان سونرا تیمین بو اوچ اویونچو دا تبریزه گلیب تیراختورا قوشولموشدورلار. اوسمارین ایشی بو یاریشمادا چوخ چتیندیر. ائولریندن اوزاق اولدوقلاریندان علاوه بو مشقچی اوچ اَسکی اویونچوسو ایله قارشیلاشاجاقدیر.
تیراختور-پرسپولیس اویونو حاقدا بیلگیلر
سوپرلیگانین ۹-جو هفتهسینده پنجشنبه گونو ساعات ۱۸-ده تیراختورلا پرسپولیس تیملری تبریزین بنیاندیزل استادیوموندا یاریشاجاقلار. پرسپولیسین اویونچولاری کئچن سککیز یاریشمالاریندا ایکی اویونو قازانیب بئش اویونو مساوی ائدیب بیر اویونو دا اودوزموشلار. بو گونه قدر پرسپولیس ۱۱ امتیازلا جدولین یئددینجی سیراسیندادیر. اونلار یئددی قول وورموشدور. بئش دفعه ده داروازالاری آچیلمیشدیر. علی علیپور بئش قول ووراراق پرسپولیسین اَن یاخشی اویونچوسودور. تیراختور دا اوچ اویونو اودوب، اوچ اویونو مساوی ائدیب تکجه بیر یاریشمانی اودوزموشدور. امیرحسین حسینزاده بئش قول هابئله بیر قول پاسی ایله تیراختورون ائتکیلهییجی اویونچولارینداندیر. کئچن ۴۰ یاریشمانین ۲۱ اویونون پرسپولیس ، ۱۱ اویونون تیراختور اودموشدور.
یاریشما: رقابت
قول: گل
اویونچو:بازیکن
قاپیچی: دروازهبان
سونوج: نتیجه
داهیلر لیگاسی: لیگ نخبگان
اولای: اتفاق
اؤز گووهن: اعتماد به نفس
نظرات (0)