خبر ترکی:
دوخسان امتیازین ساتماق ایستهییر!
اورمییهنین دوخسان فوتبال تیمی کئچن فصل هوادارلارینین دستهیی ایله بیرینجی سویه فوتبال لیگاسینا چاتمیشدیر. اونلار گوجلو بیر تیم باغلادیقدان سونرا یاریشمالارا قاتیلمیشلار. چوخلاری دوخسانین سوپرلیگایا گئدهجهیینی گؤزلهدییی زامان سوروملولار سؤزلرینی توتابیلمهمیشلر. اونلار مالی سورونلارا رغمن ۱۰-جو هفتهیه قدر دایانماغا چالیشمیشلار. آنجاق ایندی بیردن بیره تیملرینین امتیازینی باشقاسینا تاپشیرماق ایستهییرلر. بو مسئله تیراختورلا زنوزینین حئکایهسینه بنزهییر. کئچن فصلین باشلانغیجیندان اؤنجه محمدرضا زنوزی ده تیراختورو باشقاسینا تاپشیرماق ایستهییردی. آنجاق هئچ بیر قوروم بو آغیر سوروملولوغو قبوللانمامیشدیر.
اون قول پوستونسکینین یوخلوغوندا
تیراختور سون ایکی یاریشماسیندا یوخاری حاضیرلیقلا اویون مئیدانینا کئچمیشدیر. اونلار بو ایکی یاریشمادا ۱۰ قول وورموشلار. شارجه-تیراختور یاریشماسیندان اؤنجهکی مشقده ایقور پوستونسکی همسترینگ ناحیهسیندن یارالانمیشدیر. او اوزدن بو اویونو اَلدن وئرمیشدیر. بو مسئله تیراختورچولارین نیگرانچیلیغینا سبب اولموشدور. آنجاق اسکوچیچ مهدی شیرییه گووهنیب اونو مئیدانا گؤندرمیشدیر. او تیراختورون سون ایکی یاریشماسیندا پارلامیشدیر. دراقان اسکوچیچ اویون تاکتیکلرینی دهییشهرک باشاریلی اولموشدور. آنجاق بو تاکتیکلر پرسپولیسین قارشیسیندا یارارلی اولمایابیلر. پوستونسکینین مصدوم اولدوغونا گؤره یوخاری احتمال ایله یئنه ده مهدی شیری دفاع هافبک اولاراق اویون اوینایاجاقدیر.
یادگارین چمنی پیس دورومدا
دوغو آذربایجانین گنجلر و ورزش قورومونون باشچیسی تیراختور-پرسپولیس یاریشماسینین یادگاردا کئچیریلهجهیینه سؤز وئرمیشایدی. آنجاق آلدیغیمیز بیلگیلره گؤره هابئله یایینلانان گؤرونتولره دایاناراق استادیومون چمنی حاضیر دئییل. یادگارین هیبریدی چمن اَکمک سورهجی تامامی ایله باشاچاتمامیشدیر. چمنین بیر سیرا بؤلوملری یئترینجه بؤیومهمیش. هابئله بیر سیرا بؤلوملرینده ساریلیقدا واردیر. بئلهلیکله تیراختور پرسپولیسدن بنیاندیزل استادیوموندا میزبانلیق ائدهجکدیر. بو ایکی تیمین اویونو انضباطی کمیتهنین حؤکمونه گؤره هوادارسیز کئچیریلهجکدیر.
مشقچی: مربی
سویه: سطح
سونوج: نتیجه
یاریشما: رقابت، مسابقه
اویون: بازی
اؤنجه: قبل
سورهج: فرآیند
گؤزلنتیلر: انتظارات
اؤزل: خاص، ویژه
یئنی: جدید، تازه
قول: گل
شاشیردیجی: تعجب برانگیز
نظرات (0)