خبر ترکی:
علیپور تیراختورون اویونونا چاتاجاق‌‌می؟
علی علیپور، پرسپولیس باشگاهی‌نین مهاجمی، ذوب‌آهن یاریشماسینا یاخین‌لاشارکن حساس بیر دوروم‌دادیر. او بو گونه قدر اوچ دفعه ساری کارت آلمیش‌دیر. علیپور ذوب‌آهنین قارشیسیندا بیر داها کارت آلماق‌لا تیراختورون اویونوندا محروم اولاجاق‌‌دیر. بو مسئله فنی پرسپولیس‌ین فنی کادری‌نین نیگران‌چیلیغینا سبب اولموش‌دور. بو تیمین اَلینده اولان اؤزل مهاجم تکجه بیر نفردیر. او اوزدن علیپورون یوخلوغو اونلار اوچون چوخ قورخونج‌دور. اونلار یئنی فصل‌ده بئش قول وورموش‌لار. بو قول‌لارین دؤردون علیپور وورموش‌دور. آمارلارا گؤره بو اویونچو تیمین اؤنملی مهره‌لریندن‌دیر. دئمک اونون یوخلوغوندا حریفه قول وورماق چوخ چتین اولاجاق‌‌دیر.
دانیال اسماعیلی‌فر آسیادا بیرینجی‌دیر
تیراختور بئش قول ایله شارجه‌نی آسیا یاریشمالاریندا اودموش‌دور. تیمین دؤردونجو قولون دانیال اسماعیلی‌فر وورموش‌دور. او ایلک دفعه آسیا سویه‌سینه قول ووراراق پارلامیش‌دیر. دانیال سوپرلیگ‌ده تیراختورون اَن یاخشی اویونچولاریندان‌دیر. بو اویونچو آلومینیوم-تیراختور یاریشماسیندا پاریلدامیش‌‌دیر. اسماعیلی‌فر شارجه‌نین قارشیسیندا سوفا سایتینین آمارلارینا گؤره ۹ نومره‌نی قازانمیش‌دیر. لوژکیا ایکی قول ووردوغونا رغمن بو آمارلا دانیال تیراختورون اَن یاخشی اویونچوسو سئچیلمیش‌دیر. بو اویونچو اورتالاما ۸.۱ نومره ایله آسیا داهی‌لر لیگاسی‌نین بیرینجی اویونچوسودور.
خطیبی‌نین ایشی دوخسان‌دا بیتدی!
اورمییه‌نین دوخسان باشگاهی رسمی رسانه‌سینده حسین خطیبی‌نین تیمدن آیریلدیغینی بیلدیرمیش‌دیر. اونلارین بیلدیرسی بئله‌دیر:« بو بیلدیری ایله حسین خطیبی، باشگاهین فوتبال تیمی‌نین باش مشقچی‌سی‌‌نین، تیمدن آیریلدیغینی بیلدیرمک ایسته‌ییریک. حسین خطیبی آریو اسلام‌شهرین قارشیسیندا بیر-هئچه اودوزدوقدان سونرا استعفا ائتمیش‌دیر. باشگاهین مودورلری تیمین سونوج‌لارینی آراشدیراراق سایغی ایله اونون ایسته‌یینی قبوللانمیش‌لار. دوخسان باشگاهی حسین خطیبی‌نین چالیشمالاریندان دولایی اونا تشککورونو بیلدیره‌ره‌ک یولون داوامیندا اونون اوچون باشاری‌لار دیله‌ییر. لیگین داوامیندا آماج‌لاریمیزا چاتماق اوچون داها گوجلو چالیشاجاغیمیزا سؤز وئریریک.»
یاریشما: رقابت، مسابقه
قارشیسیندا: روبرویش
یئنی: جدید
اؤزل: ویژه، خاص
قول: گل
قورخونج: ترسناک
اؤنملی: مهم
سویه: سطح
داهی‌لر لیگاسی:لیگ نخبگان
اورتالاما: میانگین
باشاری: موفقیت
سونوج: نتیجه
قارشیسیندا: روبرویش
نظرات (0)