خبر ترکی:
اسکوچیچ فصلین اَن یاخشی مشقچیسی
دراقان اسکوچیچ تیراختورلا قهرمان اولدوقدان سونرا فصلین اَن یاخشی مشقچیسینین اؤدولونو آماق اوچون «توپا» تؤرهنینه چاغیریلمیشدیر. آنجاق او چاغلار اسکوچیچ کرواسیدهایدی. او کئچن فصل اوچ آی اَن یاخشی مشقچی سئچیلمیشدیر. سونوندا دراقان فصلین اَن یاخشی مشقچیسینین اؤدولونو آلمیشدیر. او کؤمکچیلریله بیرلیکده بو اؤدولو آلماق اوچون گئتمیشدیر. تیراختورون کرووات باشمشقچیسی کئچن فصل ۲۱ اویونو اودموشدور. اونون تیمی ۵ اویونو مساوی ائدیب ۴ اویونو دا اودوزموشدور. بئلهلیکله اونون تیمی پاریلدایارای سوپرلیگانین قهرمانلیغینی اَلده ائتمیشدیر.
تیراختورون بئشینجی تهیَری
اسکوچیچ ده برانکو ویاخود باشقا کروات مشقچیلره تای فصلین سورهجینده دهییشیلمز ۱۱ اویونچو ایله اویون اویناییر. اویونچولار مصدوم و یاخود محروم اولدوقلاری زامان تکجه ۴ اویونچونو اونلارین یئرینه مئیدانا گؤندریر. باشقا اویونچولار دا تیمین بئشینجی تهیَری ساییلیرلار. بو مسئلهدن دولایی فصلین ایلک باشیندا تیراختورون ایکی اویونچو آلماغی شاشیردیجیایدی. فرشاد فرجی ایله مهرداد محمدی میللی تیمین هابئله پرسپولیسین یاخشی اویونچولاریندانایدیلار. آنجاق اسکوچیچین بو اخلاقی ایله تانیش اولاراق ریسک ائدیب تیراختورا قوشولموشلار. اونلار بو گونه قدر مئیدانا گیرمک اوچون یاخشی فورصت اَلده ائتمهمیشلر. تکجه دوننکی یاریشمانین سون آنلاریندا اویون اوینامیشلار.
آلوزین فیلمی زامانیندا یایینلاناجاق!
سعید مظفریزاده سون دانیشیغیندا ریکاردو آلوز حاقدا دیققت چکیجی سؤزلر دئمیشدیر:« آلوز ویاخود باشقا اویونچولارین هئچ بیریسی تیراختور حاقدا دانیشماق اوچون حاقلی دئییللر. تیراختور بوتون آدلاردان اوستوندور. وقتیمی اونلار حاقدا دانیشماقلا کورلاماق ایستهمهییرم. اویونچو گلیب گئدندیر. تیراختور باشگاهی اونلارین هامیسیندان بؤیوکدور. آلوز تیراختورون کؤلگهسینده بؤیوموشدور. بو اویونچونون چالیشمالارینی تقدیر ائدیریک. آنجاق بو سایغی قارشیلیقلی اولمالیدیر. اَلیمیزده اولان سندلری ده زامانیندا یایینلایاجاغیق.»
اَن یاخشی: بهترین
مشقچی: مربی
باش مشقچی: سرمربی
اؤدول: جایزه
اویون: بازی
سون: آخر، پایان
تهیر: تایر
شاشیردیجی: تعجب برانگیز
ایلک: اول
سورهج: پروسه، فرآیند
یاریشما: رقابت، مسابقه
باشقا: دیگر
یایینلاماق: منتشر کردن
نظرات (0)