دوخسان تهراندا، سونگون تبریزده
بیرینجی سویه فوتبال لیگاسینین دوققوزونجو هفتهسینده اورمییهنین دوخسان تیمی اسلامشهرده مئیدانا گئدهجکدیر. مسسونگون ده تبریزده حریفینه میزبانلیق ائدهجکدیر. سونگون ساعات ۱۶-دا بنیان دیزل استادیوموندا صنعت نفت آبادانلا یاریشاجاقدیر. مهدی بخشی کئچن هفتهدن مسین رهبرلیینی اَله آلمیشدیر. آنجاق اونون تیمی ایکی منفی امتیازلا جدولین دیبیندهدیر. دوخسان دا اسلامشهر استادیوموندا آریو تیمی ایله یاریشاجاقدیر. دوخسان ۱۱ امتیازلا جدولین بئشینجی سیراسیندادیر. اونلار بو یاریشمانی اوداراق جدولین بیرینجیلیینه یاخینلاشابیلرلر.
کاپیتان شجاع نیمکته داریخیب
شجاع خلیلزاده بیر هفته بوندان اؤنجه میللی تیمین یاریشماسی اوچون اماراتداایدی. او آسیا یاریشمالارینا قاتیلماق اوچون تیراختورلا بیرلیکده یئنیدن بو اؤلکهیه قاییداجاقدیر. تیراختورون دفاع خطی شجاعنین رهبرلیی ایله داروازانی باغلی ساخلاماق اوچون چالیشاجاقدیر. بو اویونچو بیرانوند کیمی بیر گون دینجلدیکدن سونرا تیراختورون مشقلرینه قوشولموشدور. او یئنی فصلده شاشیردیجی بیر رکورد قیرمیشدیر. شجاع، سوپرکاپ یاریشماسیندا ، آلتی دفعه لیگده، ایکی دفعه آسیا یاریشمالاریندا ، ایکی دفعه ده حذفی یاریشمالاردا مئیدانا گئتمیشدیر. بئلهلیکله ۲۰۲۵-۲۶-جی فصلده ۱۰ یاریشمادا اویون اوینایاراق رکورد قیرمیشدیر.
تیراختور اولدوزلاریلا شارجهیه اوچدو
تیراختور فوتبال تیمی آسیا یاریشمالاریندا ایکی ایلک اویونون مساوی ائتمیشدیر. آسیا یاریشمالارینین اوچونجو هفتهسینده تیراختور اماراتین الشارجه تیمی ایله قارشیلاشاجاقدیر. الوحده ایله الاهلییه گؤره شارجه جدولده داها آشاغیدادیر. شارجهنین اویونچولارینین سویهسی ده اونلارین اویونچولاریندان فرقلیدیر. او اوزدن تیراختور بو یاریشمانی اودماق اوچون چالیشاجاقدیر. مهدی ترابیده بو گون اونلارین کاروانیندا گؤرونموشدور. او مصدوم اولدوغو اوچون تیراختور-الوحده یاریشماسینا قاتیلابیلمهمیشدیر. آنجاق دوماقوی دروژدوک تیمین کروات مهاجمی بو یاریشمانی اَلدن وئرهجکدیر.
سویه: سطح
یاریشما: رقابت
اویون: بازی
اویونچو: بازیکن
مشق: تمرین
اؤنجه: قبل
یئنی: جدید
شاشیردیجی: تعجب برانگیر
قارشیلاشماق: روبرو شدن
نظرات (0)