خبر ترکی:
تیراختور ۲۷۰ دقیقه قول وورابیلمه‌دی
تیراختورون حمله خطی یئنی فصل‌ده چوخ گوجسوزلشمیش. اونلار سون اوچ یاریشمالاریندا هئچ بیر قول وورابیلمه‌میش‌لر. تیراختور لیگین قهرمانی اولاراق سوپرکاپ یاریشماسین دا قازانمیش‌دیر. بو گونه قدر تیراختور آسیا هابئله سوپرلیگ‌ده ۹ اویون اوینامیش‌دیر. ۳ اویونو قازانیب، ۵ اویونو مساوی ائدیب بیر اویونو دا اودوزموش‌لار. اسکوچیچ‌ین اویونچولاری تکجه ۳ یاریشمادا قول وورابیلمیش‌لر. اونلار فجرسپاسی، الوحده، فولاد خوزستان تیم‌لرینین داروازاسین آچابیلمه‌میش‌لر. دئمک ۲۷۰ دقیقه ایچینده بیر قول دا وورابیلمه‌میش‌لر. مهدی هاشمی‌نژاد ایله امیرحسین حسین‌زاده میللی تیمده چالیشماقدادیرلار. او اوزدن اسکوچیچ حمله خطینی تیمین باشقا اویونچولارینا تاپشیراجاق‌دیر.
یادگارین سارالمیش چمنی
حبیب مقصودی یادگار استادیومونون سارالمیش چمنیندن یایینلانان گؤرونتولر حاقدا آچیقلاما وئرمیش‌دیر:« یادگارین چمن اَکمه سوره‌جی‌نین ایکینجی آشاماسی باشاچاتمیش‌دیر. دؤرد-بئش گون سونرا دا چمن‌لر یاشیل‌لاشاجاق. یادگارین چمن اَکمه برنامه‌سین تورکییه‌لی اوزمان‌لار وئرمیش‌لر. بو برنامه ایله ایلین سونونا قدر دؤرد دفعه مئیدان‌دا چمن اَکمه‌لییک. هیبریدی چمن اَکمه‌نین اؤزل سوره‌جی واردیر. چمنین توخومو قوم‌لا قاریشیق مصنوعی چمنین ایچینده اَکیلمه‌لی‌دیر. تیراختور باشگاهی‌نین ایسته‌یینه گؤره استادیومو پرسپولیس‌‌دن میزبانلیق ائتمک اوچون حاضیرلاییریق.»
اورمییه‌نین بو گونکو حَماسه‌سی
بیرینجی سویه فوتبال لیگاسی‌نین سککیزینجی هفته‌سینده اورمییه‌نین دوخسان تیمی مازندرانین نساجی تیمینه میزبانلیق ائتمیش‌دیر. استادیوما گلن هوادارلارین سایی اونودولمازایدی. اورمییه‌یه چاتان یول‌لارین بیر چوخو بو گون باغلانمیش‌دیر. دوخسان بیرینجی سویه‌‌ده اوینادیغی ایلک فصل‌ده یاخشی سونوج‌لار اَلده ائتمیش‌دیر. اونلار سوپرلیگا گئتمک اوچون چالیشماقدادیرلار. بو گون قادین‌لارلا کیشی‌لر بیرلیکده تیراختورلا دوخسانین بایراق‌لارین داشییردیرلار. اونلار اَل-اَله بؤیوک حماسه یاراتمیش‌دیر‌لار.
اَسکی: قدیمی
سون: آخر، پایان
اؤرنک: مثال
دوروم: موقعیت
یئنی: جدید
سویه: سطح
یاریشما: رقابت، مسابقه
سونوج: نتیجه
اؤدول: جایزه
ایلک: اولین
نظرات (0)