پرسپولیس‌ین یئنی بیلدیری‌سی
علیرضا بیرانوندله پرسپولیس‌ین پرونده‌سی بیرونون محرومیت حؤکموندن سونرا بیتمیش نظره گلیردی. آنجاق بو قاپیچی یوکسک ورزش محکمه‌سینه(CAS)شکایت آپارمیش‌دیر. او اوزدن هله‌لیک اونون محرومیتی دایاندیریلمیش‌دیر. CAS دا هر ایکی طرفین سندلرینی ایسته‌میش‌دیر. ایندی ایسه آراشدیرمالارینین سونا چاتدیغینی بیلدیرمیش‌دیر. CAS هر ایکی طرفدن دادگاه‌دا دینلمک ایسته‌دیک‌لرینی سوروشموش‌دور. پرسپولیس باشگاهی دا بو اوتوروم‌دا اولماق ایسته‌میش‌دیر.
آذربایجان تیم‌لرینین باشاری‌سیزلیغی
ورزقانین مس‌سونگون فوتبال تیمی سایپا تیمینه اودوزاراق آزادگان لیگاسی‌نین جدولینین دیبینده ایکی منفی امتیازلا دایانمیش‌دیر. بیرینجی سویه فوتبال لیگاسی‌نین یئددینجی هفته‌سینده مس‌سونگون اورمییه‌نین باکری استادیوموندا سایپا تیمینه میزبانلیق ائتمیش‌دیر. آذربایجان فوتبالی‌نین نوماینده‌سی آلتی اویوندان تکجه بیر امتیاز قازانمیش‌دیر. اونلار مجوز آلابیلمه‌دیک‌لری اوچون اوچ امتیاز اَلدن وئرمیش‌لر. بئله‌لیکله یئددی یاریشمادان ایکی منفی امتیاز اَلده ائتدیک‌لری اوچون جدولین دیبینده یئرلشمیش‌لر.
سوپرلیگ جدولینین پیس دورومو
سوپرلیگانین آلتینجی هفته‌سی چادرملو-استقلال یاریشماسیندان سونرا باشاچاتمیش‌دیر. سوپرلیگانین ایییرمی بئشینجی دؤورونون جدولی اؤزل بیر جدول‌دیر. تیم‌لرین هئچ بیریسی بو گونه قدر اون امتیازدان چوخ اَلده ائده‌بیلمه‌میش‌دیر. تیراختور، گل‌گهر، ملوان، آلومینیوم تیم‌لری دوققوز امتیاز قازانمیش‌لار. بو امتیازلار لیگین بیرینجی تیمی اوچون یاخشی دئییل‌دیر. تیراختور فصلین دؤرد یاریشماسیندا قول وورابیلمه‌میش‌دیر. آنجاق سپاهان‌لا آلومینیوم تیم‌لرینی اودموش‌دور. هابئله اوچ یاریشمادا مساوی سونوج قازاندیغی اوچون هله‌لیک جدول‌ده بیرینجی‌دیر.
دانیال اسماعیلی‌فر میللی تیمه قوشولدو
فوتبال فدراسیونون رسمی سایتی‌نین بیلدیرمیش:« میللی تیمین فنی کادری صالح حردانی‌نین استقلال-چادرملو یاریشماسیندا مصدوم اولدوغونو بیلدیرمیش‌دیر. دانیال اسماعیلی‌فر تیراختورون اویونچوسو اونون یئرینه میللی تیمه چاغیریلمیش‌دیر». میللی تیمین اوردوسو روسیه ایله تانزانیانین قارشیسیندا اویناماق اوچون حاضیرلیق آپارماق‌دادیر. اسماعیلی‌فر، حردانی مصدوم اولدوق‌دان سونرا میللی تیمه چاغیریلمیش‌دیر. بئله‌لیلکه تیمین ترکیبی ده‌ییشیلمیش‌دیر. بو مسئله فوتبال اورتام‌لاریندا دانیشیق قونوسونا چئوریلمیش‌دیر.
یئنی: جدید
بیلدیری: اطلاعیه
قاپیچی: دروازه‌بان
آراشدیرما: بررسی
باشاری: موفقیت
یاریشما: رقابت
سویه: سطح
دوروم: موقعیت
سونوج: نتیجه
قارشیسیندا:روبرویش
قونو: موضوع
اؤزل: ویژه، خاص
نظرات (0)