فولاد هوادارلارینی چاغیردی
شنبه گونو سوپرلیگانین آلتینجی هفتهسینده خوزستانین فولاد تیمی ایله تیراختور اهوازین فولاد آرنا استادیوموندا یاریشاجاقلار. کئچن فصل بو ایکی تیمین اویونو ایکی-بیره باشا چاتمیشدیر. تیراختور مهدی هاشمینژادین سون دقیقهده ووردوغو قول ایله قهرمانلیغا دوغرو بؤیوک آددیم آتمیشدیر. آنجاق تبریزده کئچیریلن یاریشما فولاد اوچ امتیازی قازانمیشدیر. فولادین اویونچولاری ویدیو پایلاشاراق هوادارلادان استادیوما گئتمکلرینی ایستهمیشلر. ساسان انصاری فولادین کاپیتانی بئله دئمیشدیر:« دهیرلی طرفدارلاریمیز سیزین وارلیغینیز بیزیم اوچون اؤنملیدیر. ایندی ایسه بیز هر گوندن داها آرتیق سیزین دستکلرینیزی ایستهییریک. سیزین یولونوزو گؤزلهییریک.»
مسسونگونون مشقچیسی دهیشیلهجک
مسسونگون فوتبال تیمی اورمییهنین دوخسان تیمینه اوچ-هئچه اودوزدوقدان سونرا باشگاهین مودورلری فنی کادرین ترکیبینده دهییشیکلیک یاراتماق ایستهمیشلر. یوخاری احتمال ایله صادق پورحسین، علی ابراهیمیانین یئرینده اوتوراجاقدیر. مس فصلی چوخلو حاشیهلرله باشلامیشدیر. ایندی ایسه ایکی منفی امتیازلا جدولین دیبینده یئرلشمیشلر. او اوزدن دوروملارینی دهییشدیرمک ایستهییرلر. بیر سیرا قایناقلارین ادعاسینا گؤره تیمین فنی مسئلهلری هلهلیک صادق حسینپورا تاپشیریلاجاقدیر. سیروس دینمحمدی، محمد ابراهیمی، فرشاد پیوس، مهدی بخشیزاده کیمی مشقچیلرین آدی سونگونون سئچهنکلری آراسیندا گؤرونمکدهدیر.»
بیرو ایله سعید دقیقینین گؤروشو
پیکان فوتبال تیمی بو گون تهراندان کرمانا ساری یولا دوشموشدور. هاوا لیمانیندا بو تیمین اویونچولاری علیرضا بیرانوندله پیکانین اویونچولاری قارشیلاشمیشلار. هر ایکی طرف سورپرایز اولموشلار. بیرانوند تیراختورا قوشولماق اوچون تبریزه گئدیردی. او فولاد-تیراختور یاریشماسیندا داروازادا دورماق اوچون حاضیرلانماقدادیر. بیرو سعید دقیقی ایله چوخ ایستی دانیشمیشدیر. بیر نئچه دقیقه ده پیکانین اویونچولاریلا گؤروشموشدور. بیرانوند احمد گوهرینی ده چوخ صمیمی قارشیلامیشدیر. اونونلا میللی تیمین تجروبهسی حاقدا دانیشمیشدیر.
بیرو؛ بو اؤدول تیتیلریندیر
علیرضا بیرانوند تیراختورون قاپیچیسی اینستاگرام صفحهسینده کئچن فصلین اَن یاخشی قاپیچیسینین اؤدولونو آلدیقدان سونرا اینستاقرام صفحهسینده بئله یازمیشدیر:« بو اؤدولو هر زامان گؤزومون قاباغیندا ساخلامالییام. فوتبال حیاتیمین اَن چتین گونلرینده کیملرین یانیمدا اولدوغونو بو اؤدول ایله خاطیرلاییرام. سوپرلیگانین اَن یاخشی قاپیچیسی اولاراق پیس اولماق اوچون حاققیم یوخدور. هر زامان یاخشی قالماق اوچون ساواشمالییام. بو اؤدول منیم دئییل. بلکی جانیمدان عزیز عاییلهمه هابئله معرفتلی تیتیلره عاییددیر.»
اؤدول: جایزه
قاپیچی: دروازهبان
اویونچو: بازیکن
یاریشما: رقابت، مسابقه
هاوا لیمانی: فرودگاه
مشقچی: مربی
سئچهنک: گزینه
دهیرلی: باارزش
دستک: کمک، حمایت
سون: آخر، پایان
اؤنملی: مهم
نظرات (0)