تیراختور یئنه بنیان دیزلده
تبریزین یادگار استادیومونون چمن دورومونا گؤره تیراختورون یاریشمالاری سوپرلیگانین یئددینجی و دوققوزونجو هفتهسینده بنیاندیزل استادیوموندا کئچیریلهجک. آنجاق مهر آیینین یئددینجی گونو تیراختورلا الوحده یاریشماسی یادگار استادیوموندا کئچیریلهجکدیر. آنجاق چمنی قوروماق اوچون هابئله استادیومون اسکیکلرینی دوزلتمک اوچون آبان آیینین ۱۲-جی گونونه قدر هئچ بیر اویون یادگاردا کئچیریلمهیهجک.
تیراختور-الوحدهنین سینما بیلیتلری بیتدی
الوحده ایله تیراختورون یاریشماسی صاباح ابوظبینین سینما سیتیسینده یایینلاجاقدیر. الوحدهنین طرفدارلاری سینما بیلیتلرینین هامیسین آلمیشلار. بو یاریشما آسیا داهیلر لیگاسیندا هر ایکی تیمین ایکینجی اویونو اولاجاقدیر. الوحده کئچن یاریشماسیندا ایکی بیره عربستانین الاتحاد تیمین اودوب اوچ امتیاز اَلده ائتمیشدیر. بو یاخشی سونوج اونلارا روحیه وئرمیشدیر. تیراختور دا اون نفرله اویون اویناماق مجبوریتینده قالدیغینا رغمن شباب الاهلینین قارشیسیندا مساوی سونوج قازانمیشدیر. الوحده اماراتین ادنوک لیگاسیندا بیر-هئچه الجزیرهنی اودموشدور. تیراختورلا فجرین یاریشماسی دا هئچ هئچه باشاچاتمیشدیر.
محمد قربانی تیراختورون قارشیسیندا
محمد قربانی الوحدهنین ایرانلی اولدوزو اورتا خطین اوزون موددتدن سونرا ایرانلی بیر تیمله قارشیلاشاجاقدیر. او سپاهاندان سونرا روسیه لیگاسینا قوشولموشدور. ایندی ایسه الوحدهنین باهالی اویونچولاریندان بیری ساییلیر. قربانی تیراختورلا قارشیلاشدیغی سون اویوندا سپاهاندا ژوزه مورایسین نظری آلتیندا چالیشیردی. سونوندا دا سپاهانلا بیرلیکده اوچ-بیره تیراختورو اودموشدور. او بیر داها مورایسین مشقچیلییی ایله تیراختورلا قارشیلاشاجاقدیر.
تیراختورون ایکی اویونچوسونون یوخلوغو
تیراختورلا اماراتین الوحده تیمی دوشنبه ساعات ۱۹:۳۰-دا تبریزین یادگار استادیوموندا یاریشاجاقلار. بو یاریشمادا تیراختورون ایکی اویونچوسو ترکیبده اولمایاجاقلار. مهدی ترابینین مصدومیت دؤورو هله بیتمهمیشدیر. او اوزدن هلهلیک اویون مئیدانینا گیرهبیلمهیهجکدیر. اوندان علاوه دوماقوی دروژدوک دا AFC نین انضباطی کمیتهسینین حؤکمو ایله ایکی یاریشمادان محروم اولموشدور.
یاریشما: رقابت، مسابقه
اویونچو: بازیکن
سون: آخر، پایان
مشقچی: مربی
سونوج: نتیجه
قوروماق: محافظت کردن
اویون: بازی
داهیلر لیگاسی: لیگ نخبگان
قارشیسیندا: روبرویش
نظرات (0)