شجاع تکجه کاپیتان دئییل
شجاع خلیلزاده بو گونلر تکجه بیر دفاع اویونچوسو دئییلدیر. او اویون مئیدانیندا ویاخود مئیدان دیشیندا گووهنیلیر بیر رهبردیر. هابئله اَسکی اویونچولارین قارشیسیندا دا اؤزونو سوروملو بیلیر. سپاهان تیراختور یاریشماسیندان سونرا او طرفدارلاری تبریک ائتدیکدن سونرا ریکاردو آلوز ایله عارف آقاسینین حاشیهلری حاقدا بئله دانیشمیشدیر:« اونلار تیراختور اوچون چوخ چالیشمیشلار. ساغاولسونلار». شجاع هر زامان تیمین بیرلییینده اؤنملی رول اوینامیشدیر. او تیمین اویونچولارینی سویونما اوتاغیندا دا یاخشیجا رهبرلیک ائتمیشدیر. پرسپولیسله استقلال تیملرینین ایچینده اولان چاتیشمالارا دیققت ائتدییمیزده شجاع خلیلزادهنین دهیری داها یاخشی بَلیرلَنیر.
ترابی اوچ اویونو اَلدن وئرهجک
مهدی ترابی تیراختورون وینگری همسترینگ ناحیهسیندن یارالی اولدوغو اوچون مئیداندان اوزاقدیر. اونون تیمه قاییتماق زامانی بللی دئییلدیر. آنجاق کسینلیکله گلن اوچ یاریشمادا تیراختور اوچون مئیدانا گئدهبیلمهیهجکدیر. تیراختور پنجشنبه مهر آیینین اوچونجو گونو فجرسپاسی ایله یاریشاجاقدیر. اوندان سونرا مهر آیینین یئددینجی گونو آسیا داهیلر لیگاسیندا اماراتین الوحده تیمی ایله تیراختورون اویونو واردیر. سوپرلیگانین آلتینجی هفتهسینده تیراختورلا فولاد تیملری گؤروشهجکلر. بئلهلیکه ترابی بو اوچ یاریشمادا اولمایاجاقدیر. آلتینجی هفتهدن سونرا سوپرلیگ یاریشمالاری دایاندیریلاجاقدیر. گؤزلنتیلره گؤره ترابی فیفادی گونلریندن سونرا مئیدانا قاییداجاقدیر.
آلوزین بیرینجی اویونو آغیر-ائتکیسیز!
ریکاردو آلوزین اویون کارتی تیراختور-سپاهان یاریشماسیندان اؤنجه وئریلمیشدیر. او سپاهانین تمل ترکیبینده ده وارایدی آنجاق تیمین اویونچولاریلا آنلاشا بیلمیردی. آلوزین بو یاریشمادا اَن اؤنملی لحظهسی تیراختورون داروزاسینا ووردوغو ائشییه گئدن شوتایدی. او سپاهانین ترکیبینده اویون جورلاماق قونوسوندا هئچ ایش گؤره بیلمهمیشدیر. بو اویونچونون سویهسی فنی کادرین گؤزلنتیلریندن ده آشاغیایدی. محرم نویدکیا، سپاهانین باشمشقچیسی ده اویوندان اؤنجهکی خبر کنفراسیندا آلوزین دورومونا توخونموشدور. آنجاق آلوزی تمل ترکیبده اویناتماقلا اونون اوسته حساب گئتدیینی گؤسترمیشدیر.
تیراختورون اوزبک حریفی یاخشی دورومدا
نسف قارشی آسیا داهیلر لیگاسیندا اوزبکیستانین تکجه نومایندهسیدیر. اونلار تیراختورون حریفلریندن بیریدیرلر. نسف قارشی اوزبکیستان لیگاسینین کئچن دؤرد هفتهسینده بوتون یاریشمالارینی اوداراق بیر داها قهرمانلیغیا یاخینلاشمیشلار. سککیز هفته فصلین سونونا قالارکن ایییرمیایکی یاریشمادان سونرا قیرخ دوققوز امتیازلا دؤرد امتیاز اختلافلا نفتچی فرغانهدن دوققوز امتیاز پاختاکورلا اختلافلاری اولاراق جدولین اوچونجو سیراسیندا دایانمیشلار. قالان یاریشمالارا گؤره اونلارین شانسی قهرمانلیق اوچون چوخ یوخاریدیر.
دوروم: موقعیت
یاریشما: رقابت، مسابقه
سون: آخر، پایان
باشمشقچی: سرمربی
قونو: موضوع
اؤنجه: قبل
سویه: سطح
اؤنملی: مهم
گؤزلنتیلر: انتظارات
داهیلر لیگاسی: لیگ نخبگان
قارشیسیندا: روبرویش
سوروملو: مسئول
نظرات (0)