آلوز تیراختورچولارین گؤزوندن دوشدو
ریکاردو آلوز کئچن اوچ فصل‌ده تیراختوچولارین آراسیندا اَن چوخ سئویلن اویونچولاردان‌ایدی. او آلیش وئریش گون‌لرینده بیردن بیره تیراختوردان آیریلاراق سپاهانا قوشولموش‌دور. ایلک گون‌لرده هوادارلار آلوزین تیمه قاییتماسینی ایسته‌‌میش‌دیر‌لر. آنجاق باشگاه اونون یئرینی دولدورماق اوچون باشقا اویونچولار آلمیش‌دیر. یئنی اویونچولار چوخ تئز تیمه آلیشمیش‌لار. هابئله تیم یاخشی سونوج‌لار قازاندیغی اوچون آرتیق هوادارلار آلوزین قاییتماسینی ایسته‌مه‌ییرلر. آرتیق تیراختورچولار باشگاهین شکایت‌لرینین سونوجون گؤزله‌ییرلر. اونلار ایندی آلوزین محروم اولماسینی ایسته‌ییرلر.
تیراختورون حریف‌لری پیس دوروم‌دا
تیراختور آسیا داهی‌‌لر لیگاسی‌نی بیر امتیازلا باشلامیش‌دیر. آنجاق تیراختورچولار اونلارین اوچ امتیاز قازانماق‌لارینی ایسته‌ییردیلر. دوماقوی دروژدوک قیرمیز کارت آلماساایدی تیراختورون قازانماق احتمالی وارایدی. بونلارا رغمن اونلار اَلی دولو تبریزه دونموش‌لر. آنجاق سپاهان‌لا استقلال تیم‌لری آسیا یاریشمالاریندا چوخ پیس سونوج‌لار اَلده ائتمیش‌لر. استقلال یئددی قول یئمیش‌دیر. بئله‌لیکله باشگاه‌لارینین تاریخینده اَن پیس سونوجو قازانمیش‌لار. سپاهان دا حریفیندن هئچ بیر امتیاز آلابیلمه‌‌میش‌دیر. ایندی ایسه تیراختورون حریف‌لری روحیه‌لرینی اَلدن وئرمیش‌لر. دراقان اسکوچیچ بو فورصتی سپاهانی اودماق اوچون قوللانابیلر.
قربانی؛ تیراختور گوجلو حریف‌دیر
محمد قربانی، الوحده‌نین اویونچوسو الاتحاد تیمی‌نی اوددوقدان سونرا آسیا یاریشمالاری حاقدا بئله دئمیش:« آسیا یاریشمالارینی اوغورلا باشلادیغیمیز اوچون چوخ سئوینیرم. الاتحاد آسیانین گوجلو تیم‌لریندن‌دیر. بیز اونلاری اؤز ورزشگاهیمیزدا اوددوق. بوندان اؤنجه سپاهانین کؤینه‌یی ایله الاتحادا اودوزموشام. او اوزدن بو یاریشما اوچون چوخ انگیزه‌لی‌ایدیم. تیراختور بیزیم سونراکی حریفیمیز‌دیر. اونلارین اویونچولارین فنی باخیمدان یاخشی دوروم‌دادیرلار. تیراختور ایلک یاریشماسیندا دا یاخشی سونوج قازانمیش‌دیر. کسین‌لیک‌له چتین بیر یاریشما قارشیمیزدادیر. بیز ده باشاریلی اولماق اوچون چالیشاجاغیق.
یاریشما: رقابت ، مسابقه
سونوج: نتیجه
کسین: قطعی
دوروم: موقعیت ، وضعیت
باشاریلی: موفق
ایلک: آغاز، اول، ابتدا
اؤنجه: قبل
یئنی: جدید
باشقا: دیگر
نظرات (0)