شهرداری‌نین سورون‌لاری بیتدی آنجاق...
شهرداری اورمییه یئنی اویونچولارینین سؤزلشمه‌لرینی یازدیقدان سونرا اونلاری ثبت ائده‌بیلمه‌‌میش‌دیر. دونن بو سورون‌لارین بیر سیراسی آرادان قالدیریلمیش‌دیر. آنجاق آرین محمودی‌نژاد ایله امیر آفتاب آذری‌نین سؤزلشمه‌سی فدراسیونونون اوتوماسیون سیستمینده اولان فنی سورون‌لاردان دولایی ثبت اولمامیش‌دیر. باشگاهین سوروملو‌لاری بو مسئله‌نی چؤزمک اوچون چالیشماق‌دادیرلار. سوروملولارین قهرمانلیق وعده‌سینه رغمن شهرداری اورمییه فصلین ایلک گون‌لریندن فرقلی سورون‌لارلا اوزاوزه گلمیش‌دیر.
مهدی شیری‌نین یوزه یوز آماری
مهدی شیری تیراختورلا شباب الاهلی یاریشماسیندا گؤزلنتی‌لره رغمن تیمین تمل ترکیبی ایله مئیدانا گئتمیش‌دیر. او تیبور هالیلوویچین یئرینه اویون اوینامیش‌دیر. شیری بو یاریشمادا پارلامیش‌دیر. مئیدان‌دا اولدوغو زامان الاهلی‌نین مهاجم‌لرینین قارشیسیندا دورموش‌دور. یوخاری سورعت‌له قاچدیغی اوچون مئیدانین اورتاسیندا چوخ گؤرونوردو. دفاع هابئله حمله زامانیندا تیمه یاردیمجی اولموش‌دور. آنجاق شیری هاریکا پاس‌لاری‌لا شاشیردیجی بیر آمار یازمیش‌دیر. او بو یاریشما دا ۱۹ پاس‌لا توپو مقصده چاتدیرمیش‌‌دیر. بئله‌لیکله یوزه یوز بیر آمارلا مئیدان‌دان چیخمیش‌‌دیر.
دروژدوکون یئرینه کیم اوینایاجاق؟!
دوماقوی دروژدوکون شاشیردیجی تکلی سعید عزت‌اللهی‌نی آلتی آی ائوده قالماسینا سبب اولابیلردی. آنجاق او بو ایشدن یاخاسینی قورتارمیش‌دیر. دوماقوی دا قیرمیز کارت آلاراق مئیدان‌دان چیخاریلمیش‌دیر. او اوزدن تیراختور ایکینجی یاری‌دا داها چوخ فشارلا اوینامیش‌دیر. اونلارین داروازاسی آچیلدیقدان سونرا اویونو مساوی سونوج‌لا بیتیرمیش‌لر. دروژدوک قیرمیز کارت آلدیغی اوچون الوحده‌نین قارشیسیندا دا مئیدانا گئده‌بیلمه‌یه‌جک. اوندان علاوه ترابی ده مصدوم اولدوغو اوچون بو یاریشمادا اولمایاجاق. بئله‌لیکله رگی لوشکیا ، صادق محرمی هابئله مهرداد محمدی مئیدانا گیرمک اوچون شانس قازانمیش‌لار.
شاشیردیجی: تعجب‌آور
قارشیسیندا: روبرویش
سونوج: نتیجه
گؤزلنتی‌لر: انتظارات
یاردیمجی: کمک کننده
یاریشما: رقابت، مسابقه
سؤزلشمه: قرارداد
سوروملو: مسئول
سورون: مشکل
چؤزمک: حل کردن
نظرات (0)