بنیاندیزل تیراختورچو قیزلارین اَلینده
تیراختورلا آلومینیوم تیملری جمعه گونو ساعات ۱۸-ده بنیان دیزل استادیوموندا یاریشاجاقلار. بو یاریشمادا تکجه قادینلار استادیوما گئدهجکلر. آنجاق بو تکجه بیر اویون دئییل. تیراختورچو قادینلار یئنیدن پارلایاجاقلار. اونلار کئچن فصللرده استادیوما آیاق باسان ایلک قادینلارایدیلار. اولدوزلار بو یولو باشقالاری اوچون آچمیشدیرلار. ایندی ایسه کیشیلرین یوخلوغوندا استادیوم سکیلرینده یوخاری انرژی ایله تیملرینه دستک اولمالیدیرلار. جمعه گونو اونلار اونودولماز صحنهلر یارادابیلرلر. اونلار قیرمیز بایراقلارینی قالدیراراق تیراختورون چیرپینان اورهیینه یئنی نفس وئرهجکلر.
رگی لوشکیا فیکس اوینایاجاق
یوخاری احتمال ایله دراقان اسکوچیچ تیراختور-آلومینیوم یاریشماسیندا تیمین ترکیبینده بیر سیرا دهییشیکلیکلر یاراداجاقدیر. رگی لوشیکانین تیمین تمل ترکیبینه قوشولاجاغی ظن ائدیلیر. لوشکیا تیمه قوشولدوغو گوندن بری تیراختورون باشقا خاریجی اویونچولارینا گؤره داها یاخشی اویون اوینامیشدیر. او مئیدانین اورتا خطینده دیققت چکیجی بیر اویون اویناییر. رگی کئچن فصل اؤز تیمینه قهرمانلیق یولوندا چوخ یاردیمجی اولموشدور. تیراختور باشگاهی ریکاردو آلوزین بوش یئرینی دولدورماق اوچون اونو آلمیشدیر.
بیرانوند مهرداد محمدینی آلقیشلامیش
علیرضا بیرانوند مهرداد محمدی ایله بیرلیکده تیراختورون بو گونکو مشقیندن شکیل پایلاشاراق بئله یازمیشدیر:« سؤزون یوخدور». بو قیسا آنجاق آنلاملی پایلاشیم بیرونون تیم یولداشینا دستک اولماغینی گؤستریر. محمدینین تیراختورا قوشولماغی یای آلیش وئریشلرینین اؤنملی اولایلاریندانایدی. او ۷۷ نومرهلی کؤینهیی ایله اوزون موددت نیمکتده اوتورماق مجبوریتینده قالدیقدان سونرا مئیدانا گئدهجکدیر. بیرانوند ده بو پایلاشیملا اونا روحیه وئرمک ایستهمیشدیر. محمدی لیگین یوخاری سورعتلی اویونچولاریندان ساییلیر. او اوزدن تیراختورا چوخ یاردیمجی اولابیلر.
عزتاللهیتیراختور-شباب یاریشماسیناچاتاجاق
سعید عزتاللهی یاخلاشیق بیر ایل یاریم شبابالاهلی تیمینده چالیشماقدادیر. او فصلین ایلک یاریشماسیندا شباب اوچون مئیدانا گئتمیشدیر. آنجاق فصلین ایکینجی یاریشماسیندا الوحدهنین قارشیسیندا مصدوم اولدوغو اوچون مئیدانا گئدهبیلمهمیشدیر. هابئله فیفادی یاریشمالارینی دا اَلدن وئرمیشدیر. او میللی تیمین کافا یاریشمالاریندا دا یوخایدی. عزتاللهی کئچن گونلرده شبابین مشقلرینه قاییتمیشدیر. بو اویونچو کئچن فصل ایییرمی یاریشمادا آلتی قول وورموشدور. دئمک تیراختورلا شباب الاهلی یاریشماسیندا سردار آزمونلا سعید عزتاللهی بیرلیکده تیراختورون قارشیسیندا دوراجاقلار.
یاریشما: رقابت، مسابقه
اویونچو: بازیکن
قادین: خانم، زن
دستک: کمک، حمایت
آنلاملی: معنادار
اولای: اتفاق
اؤنملی: مهم
یاردیمجی: کمک کننده
باشقا: دیگر
دهییشیکلیک: تغییرات
ایلک: اولین
نظرات (0)