خبر ترکی:
شهرداری اورمییهنین دورومو یاخشی دئییل
شهرداری اورمییه والیبال تیمینین اوردوسو چوخ پیس دورومدا کئچیریلیر. تیمین یئرلی اولمایان اویونچولاری پول آلمایانا قدر تیمه قاییتمایاجاقلار. اونلارین پول اوچون اعتصاب ائتدییی ایکینجی گونده سوروملولار بو سورونو آرادان قالدیرماق اوچون چالیشمامیشلار. اونلار اویونچولارین پوللارینی وئرمک حاقدا هئچ بیر سؤز وئرمهمیشلر. بو مسئله تیمی اومیدسیزلیک ایچینده بوراخمیشدیر. اویونچولارین پوللارینین اؤدهنیشی شهر شوراسی طرفیندن تأیید ائدیلمهلیدیر. آنجاق باشگاه سوروملولاری گَرَکلی اولان جوازلاری آلمامیشلار. بو دوروما رغمن اونلار فصلدن اؤنجه هوادارلارا قهرمانلیق سؤزو وئرمیشدیرلر.
تراکتورون ایلک آسیا یاریشماسی
تراکتور آسیا داهیلر لیگاسینین ایلک یاریشماسیندا دوبایده شبابالاهلی تیمیله قارشیلاشاجاق. اویونون قضاوتی چینلی حاکیمه تاپشیریلمیشدیر. تراکتور بیرینجی یاریشماسیندا سهشنبه گونو ، شهریور آیینین ۲۵-جی گونو ساعات ۱۹:۳۰-دا دوبای شهرینین راشد ورزشگاهیندا شباب الاهلی تیمی ایله یاریشاجاقدیر. آسیا فوتبال کنفدراسیونو بو اؤنملی یاریشمانین قضاوتینی ما نینگ آدلی تانینمیش چینلی حاکیمه بوراخمیشدیر.
تراکتورون یئنی قاپیچیسی تانیتدیریلاجاق
تراکتور باشگاهینا قوشولماق ایستهین یئنی قاپیچی، مارکو یوهانسون، کئچن ۴۸ ساعاتدا طیبی تستلر کئچیرمیشدیر. تستلرده قازاندیغی سونوجلار باشگاه طرفیندن تأیید ائدیلمشدیر. ایندی ایسه اونلار بو اویونچونون سؤزلشمهسینی ثبت ائتدیکدن سونرا رسمی اولاراق اونو تانیتدیرماق ایستهییرلر. بو ۲۷ یاشلی قولر علیرضا بیرانوندین یئرینه تراکتورون داروازاسین دولدوراجاقدیر. یوهانسون تراکتورون سون آلیشیدیر. او آلومینیومون قارشیسیندا فنی کادرین اختیاریندا اولاجاقدیر. بو گون ده بنیان دیزل استادیوموندا تیمین مشقلرینه قاتیلمیشدیر.
مهرداد اسکوچیچین گؤیلونو آلمیش
تراکتورون اوردوسوندان گلن خبرلره گؤره مهرداد محمدی فیفادی تعطیل گونلرینده یاخشیلاشمیشدیر. او دراقان اسکوچیچین مثبت نظرینی ده آلمیشدیر. تراکتورون باشمشقچیسی سون هفتهلرده بو اویونچونو آنالیز ائتمکدهایدی. ایندی ایسه اونون فیزیکسل هابئله فنی دورومونو تأیید ائتمیشدیر. محمدی کئچن فصل مصدوم اولدوغونا گؤره استقلالدا پارلایا بیلمهمیشدیر. سونرا دا یارانان حاشیهلره گؤره استقلالدان آیریلاراق تراکتورا قوشولموشدور. او اسکوچیچین اؤزل ترکیبینده اؤزونه یئر آچماق اوچون چوخ چالیشمالیدیر. آنجاق یوخاری انگیزه ایله پارلاق گونلرینه قاییتماق ایستهییر.
قاپیچی: دروازهبان
اؤزل: خاص، ویژه
سؤزلشمه: قرارداد
اویونچو: بازیکن
قارشیسیندا: روبرویش
مشق: تمرین
سونوج: نتیجه
سون: آخر، پایان
یاریشماق: رقابت کردن
ایلک: آغاز ، اول ، ابتدایی
نظرات (0)