خبر ترکی:
اورمییهنین والیبالی پولسوزدور
شهرداری اورمییه والیبال تیمینین اؤیهلری سوپرلیگانین باشلانغیجینا یاخینلاشارکن مالی سورونلارلا اوزاوزهدیرلر. آلدیغیمیز خبرلره گؤره تیمین تجروبهلی اویونچولارینا خرداد آییندان بَری هئچ بیر اؤدهنیش اولمامیشدیر. یئنی قوشولان اویونچولارین بیر نئچهسی ده پئشین اؤدهنیشلرینی آلابیلمهمیشلر. بو مسئله اویونچولار اوچون روحسل سورونلار یاراتمیشدیر. بوندان علاوه اونلارین یاشام دورومونو دا ائتکیلهمیشدیر. او اوزدن تیمین مشقلری ده یاخشی دورومدا دئییلدیر. عبدالرضا علیزاده میللی تیمده چالیشماقدادیر. او اوزدن باشگاهین مودورلری مالی سورونلاری آرادان قالدیرماق اوچون چالیشمالیدیرلار.
آلوزین باغیشلانماق شرطی؛ ایکی میلیون دلار
ریکاردو آلوزین سپاهانا قوشولماق مسئلهسی هله ده چؤزولمهمیش. او بو گونه قدر سپاهان اوچون اویون اوینایا بیلمهمیشدیر. تراکتور دا آلوزی بو راحاتلیقلا بوراخماق ایستهمهییر. اونلارین ادعاسینا گؤره سپاهان باشگاهی آلوزی تراکتوردان آیریلماق اوچون تحریک ائتمیشدیر. آلوزین اویون کارتی تراکتورون آدینا وئریلمیشدیر. او اوزدن ایلک یاریم فصلده ریکاردو آلوز سپاهان اوچون مئیدانا گئدهبیلمهیهجکدیر. تراکتور بو پروندهنی قازانماقلا سپاهانی ایکی فصل آلیش وئریشدن محروم ائدهبیلر. آنجاق اونلار سپاهانلا آلوزی باغیشلاماق قارشیسیندا ایکی میلیارد دلار ایستهمیشلر.
اؤلکهنین قضا سیستمینده اولان سورونلار
فدراسیون ایله باشگاهلار قوراللار اساسیندا یؤنهدیلسهایدیلر اؤلکه فوتبالیندا بو قدر بؤیوک سورونلارلا اوزاوزه اولمازایدیق. آنجاق بیزیم توپلومدا محکمهلریمیزده میلیونلارجا پرونده چؤزومسوز قالمیشدیر. هر بیر سؤزلشمه یازماق اوچون حقوقچولاردان یاردیم آلماق لازیمدیر. آنجاق ایران باشگاهلاری بو مسئلهنی اؤنمسهمهییرلر. بو ایشین سونوجو دا علیرضا بیرانوند و یاخود ریکاردو آلوزین پروندهسی کیمی سورونلاردیر. تراکتور باشگاهینین ادعاسینا گؤره اونلار ریکاردو آلوزه سؤزلشمهسینی یئنیلمک اوچون پول وئرمیشلر. هابئله سپاهان باشگاهی دا همن ادعانی ائتمیشدیر. آنجاق بو ایکی باشگاهین هئچ بیریسی ایندی بو اویونچونو اوینادا بیلمهییرلر. بو مسئله ایران فوتبالینین قضا سیستمینده اولان اَسکیکلیکلری آچیقلاییر.
اؤلکه: کشور
چؤزمک: حل کردن
سؤزلشمه: قرارداد
سورون: مشکل
سونوج: نتیجه
یئنی: تازه، جدید
اؤنمسهمک: اهمیت دادن
قورال: قانون
قارشیسیندا: روبرویش
پئشین اؤدهنیش: پیش پرداخت
نظرات (0)