آلوزین پرونده‌سی باشدان آیاغا ضرر
ریکاردو آلوزین پرونده‌سی یئنی بیر آشامایا چاتمیش‌دیر. بو اویونچو تراکتورلا اوچ ایللیک سؤزلشمه یازدیق‌دان سونرا سپاهانا قوشولموش‌دور. تراکتور دا فیفایا شکایت آپارمیش‌دیر. آنجاق بو پرونده باشدان آیاغا تراکتور اوچون بؤیوک ضرردیر. لیگ قورومونون بیلدیری‌سینه گؤره تراکتور آلوزین سؤزلشمه‌سینی زامانیندا ثبت ائتمیش‌دیر. او اوزدن سپاهان فصلین ایلک یاریسیندا اونون سؤزلشمه‌سینی ثبت ائده‌بیلمه‌یه‌جک‌دیر. آلوزین یوخلوغونا رغمن آدی تراکتورون لیسته‌سینده‌دیر. او تراکتورون خاریجی اویونچولارینین سهمیه‌سینی دولدورموش‌دور. بو مسئله فنی‌کادرین اَلینی یئنی اویونچو آلماق قونوسوندا باغلامیش‌دیر.
حبیبی‌نژاد؛ تراکتورا قوشولماق ایسته‌مه‌دیم
هادی حبیبی‌نژاد چادرملو تیمی‌نین اویونچوسو اؤزل بیر دانیشیق‌دا تراکتوردان اؤنری آلدیغینی بیلدیرمیش‌دیر. او تراکتورا قوشولماق ایسته‌مه‌دییی اوچون اؤز نه‌دن‌لرینی بئله آچیقلامیش‌دیر:« دؤرد ایل بوندان اؤنجه تراکتورداایدیم. تبریزین چوخ گؤزل میللتی واردیر. آنجاق باشگاه‌دا پیس اولای‌لار یاشادیم. محمدرضا اخباری ایله هادی محمدی باشیما گلن‌لری گؤرموش‌دورلر. بو ایل بیر سیرا اینسان‌لاردان آلدیغیم فیکیرلره گؤره اورا قاییتماق ایسته‌مه‌دیم. اسکوچیچ منی چوخ سئویر. او بو ایل تراکتورا قوشولماغی منه اؤنرمیش‌دیر. آنجاق او تیمده منه چوخ اویون چاتمازایدی.»
تراکتور مئیدانی بوشالتمایاجاق
سپاهان باشگاهی بو گونه قدر ریکاردو آلوزین اویون کارتی‌نی آلابیلمه‌میش‌دیر. سون زامان‌لار تراکتورلا سپاهانین آراسیندا آلوزین پرونده‌سی ایله ایلگیلی باریشما سؤیلنتلی‌لری دولانماق‌دادیر. آنجاق تراکتور بو مسئله‌نی دانمیش‌دیر. هابئله آلوزی محکوم ائتمک اوچون پرونده‌نی فیفادا تعقیب ائده‌جک‌لرینی وورغولامیش‌لار. سعید مظفری‌زاده اؤزل بیر دانیشیق‌دا بو حاقدا آچیقلاما وئرمیش‌دیر:« فوتبال فدراسیونو هر ایکی باشگاهی اورتاق بیر اوتوروما چاغیرمیش‌دیر. آنجاق آنلاشمادان خبر یوخدور. بیز شکایتیمیزی فیفادا ثبت ائتمیشیک. بو یول‌دا باشگاه هابئله هوادارلاریمیزین حاققینی ساوونماق اوچون اَلیمیزدن گلنی ائده‌جه‌ییک. اَلیمیزده اولان سندلره‌له ایشیمیزی قاباغا آپاراجاغیق.»
تراکتور-الوحده حسن‌خان قالاسیندا
۲۰۲۵-۲۰۲۶ آسیا داهی‌لر لیگاسیندا تراکتور اؤلکه فوتبالی‌نین تکجه نوماینده‌سی ساییلیر. اونلار ایلک هفته دبی‌یین راشد استادیوموندا اماراتین شباب الاهلی تیمی ایله یاریشاجاق‌‌لار. ایکینجی یاریشمادا الوحده تیمی‌له قارشیلاشاجاق‌لار آنجاق بو یاریشمانی تبریزده کئچیره‌بیلمه‌یه‌جک‌‌لر. تبریزین یادگار استادیومونون چمنی حاضیر دئییل‌دیر. او اوزدن اونلار باشقا بیر استادیومو میزبانلیق اوچون ای‌اف‌سی‌یه اؤنرمه‌لی‌دیرلر. الوحده ایله تراکتورون اویونو مهر آیی‌نین یئددینجی گونو کئچیریله‌جک‌دیر. تراکتور باشگاهی آسیا فوتبال کنفدراسیونونا قلعه حسن‌خان ( شهرقدس) استادیومونو بو یاریشما اوچون اؤنرمیش‌دیر.
یاریشما: رقابت، مسابقه
باشقا: دیگر
اؤنرمک: پیشنهاد دادن
آنلاشما: توافق
ساوونماق: دفاع کردن
ایلگیلی: مرتبط
اؤزل: ویژه، خاص
بیلدیری: اطلاعیه
سؤزلشمه: قرارداد
یئنی: جدید
آشاما: مرحله
نظرات (0)