خبر ترکی:
حسین‌زاده آرتیق نیمکت‌ده اوتورماز
امیرحسین حسین‌زاده کئچن فصل سوپرلیگانین اَن چوخ قول ووران اویونچوسو اولموش‌دور. او آسیا یاریشمالاریندا دا چوخ قول وورموش‌دور. تراکتور پنالتی ضربه‌لرینین سونوجوندا التعاونا اودوزماساایدی یوخاری احتمال ایله امیرحسین آسیادا دا اَن چوخ قول ووران اویونچو اولابیلردی. ایندی ایسه او کافا یاریشمالاریندا میللی تیمده پارلاماق‌دادیر. او تیمین کئچن هر ایکی اویونوندا قول وورموش‌دور. او اوزدن بوندان سونرا راحاتلیق‌لا اونو نیمکت‌ده اوتورتماق اولماز. میللی تیمین تمل ترکیبینده سردار آزمون‌لا مهدی طارمی حمله خطینده چالیشماق‌دادیرلار. آنجاق حسین‌زاده بو سونوج‌لارلا حمله خطینده دورماق اوچون اونلارلا یاریشاجاق‌دیر.
میللی تیمین رکوردو تراکتورون اَلینده
ایران‌لا هندین میللی تیم‌لری بو گون کافا یاریشمالارینین ایکینجی هفته‌سینده قارشیلاشمیش‌لار. سوپرلیگانین قهرمانی، تراکتوردان اوچ اویونچو میللی تیمین تَمل ترکیبینده اؤزلرینه یئر آچمیش‌لار. محمد نادری اوزون موددت‌دن سونرا میللی تیمه چاغیریلمیش‌دیر. مهدی هاشمی‌نژاد ایله امیرحسین حسین‌زاده ده تراکتوردان میللی تیمه چاغیریلمیش‌لار. هاشمی‌نژاد کارلوس کئیروش زامانی دا میللی‌ده چالیشمیش‌دیر. ایندی ایسه تراکتوردا دا یاخشی‌جا پارلاماق‌دادیر. او یاش دورومو هابئله باجاریق‌لارینا گؤره دونیا کاپی‌نین یاریشمالارینا دا قاتیلماق اوچون شانس‌لی‌دیر.
ابراهیمیان مس‌سونگون‌ده قالدی!
مس‌سونگون اویونچولارینین سؤزلشمه‌لرینی ثبت ائده‌بیلمه‌دییی اوچون تهرانین هوادار تیمینه اوچ-هئچه اودوزموش‌دور. باشگاهین مودورلری بو سونوج‌دان سونرا ایلک اولاراق تیمین رهبرلیینی علی ابرهیمیان‌دان آلماق ایسته‌میش‌لر. آنجاق بو قونو ایبطال اولموش‌دور. سونگون کئچن فصل‌ین اویونچولاری‌لا هوادارین قارشیسیندا مئیدانا گئده‌بیلردی. آنجاق ابراهیمیان بو ایشه مانع اولموش‌دور. بو مسئله سونون‌دا چاتیشمالارا سبب اولموش‌دور. او همن چاتیشمالارا گؤره رخش خودرونون قارشیسیندا تیمین رهبرلیینی اَلدن وئرمیش‌دیر. آنجاق باشگاهین مودورلری‌له دانیشیق آپاراراق اونلارین فیکرینی ده‌ییشیب سونگونون مشق‌لرینه قاییتمیش‌دیر.
قول: گل
یاریشما: رقابت، مسابقه
سونوج: نتیجه
اویون: بازی
اویونچو: بازیکن
دوروم: موقعیت
قارشیسیندا: روبرویش
مشق: تمرین
مشقچی: مربی
قونو: موضوع
سؤزلشمه: قرارداد
نظرات (0)