تراکتورلا مسرفسنجانین کئچمیش اویونلاری
سوپرلیگانین ایکینجی هفتهسینده، سهشنبه گونو تراکتورلا مس رفسنجان تیملری ساعات ۱۹-دا رفسنجان شهرینده قارشیلاشاجاقلار. بو یاریشمادا رسول خطیبی بیر داها تراکتورون قارشیسیندا دوراجاقدیر. مس ایله تراکتور ۱۰ دفعه رسمی شکیلده یاریشمیشلار. ۶ اویونو تراکتور قازانمیشدیر. ایکی اویونو مس رفسنجان اودموشدور. ایکی یاریشما دا مساوی سونوجلا باشاچاتمیشدیر. بو ۱۰ یاریشمادا تراکتور ۱۵ دفعه حریفین داروازاسین آچمیشدیر. ۸ قول دا رفسنجانلیلار وورموشلار. رسول خطیبی ده ۶ دفعه تراکتورون قارشیسیندا ساواشمیشدیر. او اوچ یاریشمانی قازانیب بیر اویونو مساوی ائدیب ایکی یاریشمانی دا تراکتورا اودوزموشدور.
تراکتورون اویونچوسو آذربایجاندا
امیر ابراهیمزاده تراکتورون اَسکی اویونچوسو آذربایجان جمهوریتینین لیگینه قوشولموشدور. او فوتبالینا باکینین شفا تیمینده داوام ائدهجکدیر. ابراهیمزاده کئچن ایل یایدا تراکتوردان آیریلدیقدان سونرا آلومینیوم اراک تیمینه قوشولموشدور. آنجاق اوردا یئترینجه باشاریلی اولمامیشدیر. او اوزدن قیش آلیش وئریشلرینده بو تیمدن آیریلمیشدیر. ایندی ایسه بو ایییرمی یاشلی مهاجم رسمی اولاراق باکینین شفا تیمینه قوشولموشدور. او اؤلکهنین گنجلر میللی تیمینده ده چالیشمیشدیر.
لوشکیا ساتدیق دئییلدی!
رجی لوشکیا آلبانی لیگینده ایگناتیا باشگاهینین اؤنملی اویونچولاریندان ساییلیردی. آنجاق ایندی تراکتور باشگاهی ایله آنلاشمیشدیر. ایگناتیا باشگاهینین باشچیسی هوادارلارینا لوشکیانین ساتیلیق اولمادیغینی دئمیشایدی. آنجاق دوروم دهییشیلمیشدیر. اونلار اؤز رسانهلرینده بو حاقدا بئله یازمیشلار:« رجی لوشکیا چوخ ساغاول! بو اویونچو تراکتور باشگاهی ایله آنلاشمیشدیر. اونا باشاریلار دیلهییریک.»لوشکیانین تراکتورا قوشولماغی چوخلارینی شاشیرتمیشدیر. نییه کی بوندان اؤنجه دفعهلرجه تورکییه لیگاسیندان دا اؤنری آلمیشدیر. بوندان علاوه ایگناتیا باشگاهینین هوادارلاری اونون تیمده قالماغینی ایستهییردیرلر. آنجاق نئچه گون اؤنجه اونون تبریزه گلمهسی کسینلشمیشدیر.
علیرضا آرتا چادرملودا پارلاماقدادیر
علیرضا آرتا، ۲۸ یاشلی دفاع اویونچوسو، آلیش وئریش گونلرینده تراکتوردان آیریلاراق چادرملویا قوشولموشدور. او فولاد خوزستانلا چادرملو یاریشماسیندا پارلامیشدیر. او کئچن فصل تراکتورون ترکیبینده اؤزونه یاخشی بیر یئر آچابیلمهمیشدیر. آنجاق ایندی چادرملودا پارلاماغا باشلامیشدیر. دئمک بو تیمده یاخشی فورصتلر قازانمیشدیر. آرتا کئچن هفته چادرملو تیمینین دفاعسینین اورهیینده دایانمیشدیر. او بو تیمه قوشولاراق نیمکتده اوتورماغی بوراخمیشدیر. هابئله یزدلی تیمه چوخ یاردیمجی اولموشدور.
یاردیمجی: کمککننده
یاریشما: رقابت، مسابقه
اویونچو: بازیکن
شاشیرماق: تعجب کردن
دیلهمک: آرزو کردن
سؤزلشمه: قرارداد
اؤنری: پیشنهاد
اؤنجه: قبل
باشاری: موفقیت
یئترینجه: به حد کافی
اَسکی: قدیمی
گنجلر میللی تیمی: تیم ملی جوانان
اؤلکه: کشور
نظرات (0)