اورمییه‌نین بورج‌لاری بیتمه‌ییر!
ورزش آذربایجان خبر وئریر، شهرداری اورمییه والیبال تیمی، ایچری‌ده‌کی بورج‌لاریندان علاوه ائشیکده آچیق اولان ایکی پرونده ایله یئنی فصلی باشلاماق مجبوریتینده‌دیر. اونلارین اَسکی بورج‌لاری والیبالین باش‌کندی اوچون سورون یاراتمیش‌دیر. اورمییه باشگاهی یوبومیر تراویسا،تیمین اَسکی باش‌مشقچی‌‌سی ایله، ۹۶-۹۵-جی ایل‌لرده تیمین پاسورو اولان اونون اوغلونا هله ده بورجلودور. آنجاق شهرداری‌نین مودورلری کئچن ایل‌لرده بو بورج‌لاری اؤده‌مک اوچون هئچ بیر ایش گؤرمه‌میش‌لر. لیگین باشلانغیجینا یاخین‌لاشارکن بو مسئله تیمین دورومونو چوخ ائتکی‌له‌یه بیلر. مودورلر بوندان اؤنجه قهرمانلیق حدینده تیم‌دارلیق ائده‌جک‌لرینه سؤز وئرمیش‌دیرلر آنجاق ایندی سؤزلرینی توتابیلمه‌میش‌لر.
بیرانوندین یئنی ایشی، هاکی میللی تیمینده
علیرضا بیرانوند دؤرد آیلیق محرومیت حؤکمو آلمیش‌دیر. ایندی ایسه هاکی میللی تیمی‌نین سئچیم تست‌لرینه حاضیرلانماق‌دادیر. بو قاپیچی سون زامان‌لار بهرام قدیمی ، هاکی فدراسیونونون باشچی‌سی ایله گؤروشموش‌دور. قدیمی بیرانوند حاقیندا بئله دئمیش‌دیر:« کئچیردییمیز مشق‌لرده اونون اویونونا باخدیم. بیرانوند گئرچکدن چوخ هوش‌لو قاپیچی‌دیر. او هاکی میللی تیمی اوچون نظرده آلدیغیمیز اوچ قاپیچی‌دان بیری‌دیر. علیرضا بیرانوند تکجه اویونچو اولاراق یوخ بلکی فدراسیونون اؤیه‌لریندن بیری اولاراق دا بیزه یاردیمجی اولابیلر. هاکی‌یه قوشولماق اوچون توتدوغو تصمیم اونون باجاریق‌لارینی گؤستریر.
استقلال، پرسپولیس، سپاهانین اعتراضی
امیرعطابخش، پیکان باشگاهی‌نین اَسکی مودورونون ادعاسینا گؤره استقلال، پرسپولیس هابئله سپاهانین طرفدارلاری تراکتوردان قورخورلار. عطابخش بو حاقدا بئله دئمیش‌دیر:« کئچن فصل تراکتور قهرمان اولدوق‌دان سونرا علیرضا بیرانوندین حؤکمونون یوباندیریلماسی باشقا تیم‌لرین اعتراضینا سبب اولموش‌دور . هابئله اورمییه‌نین اَسکی نوماینده‌لرینین سؤزلری بعضی نیگران‌چیلیق‌لار یاراتمیش‌دیر. بو اوچ باشگاهین مودورلری مالی باخیمدان سیخینتی یاشاییرلار. پرسپولیس بانک شهره جاواب وئرملی‌دیر. استقلال دا خلیج فارس هلدینگینه جاواب وئرملی‌دیر. سپاهان‌دا فولاد مبارکه‌نین سهم‌دارلارینا جاواب وئرملی‌دیر. آنجاق تراکتور اؤزل بیر باشگاه اولدوغو اوچون بو سورون‌لاری یاشاماییر».
اَسکی: قدیمی
باشقا: دیگری
سیخینتی: فشار، محدودیت
اؤزل: ویژه، خاص، شخصی
سورون: مشکل
اؤیه: عضو
قاپیچی: دروازه‌بان
یاردیمجی: کمک‌کننده
مشق: تمرین
سئچیم: انتخاب
یئنی: جدید
سون: آخر, پایان
ائتکی: تاثیر
نظرات (0)