خبر ترکی:
مهرداد محمدی یئنه نیمکت‌ده
مهرداد محمدی، استقلال‌دان آیریلاراق تراکتورا قوشولموش‌دور. آنجاق سوپرلیگانین بیرینجی هفته‌سینده تیمین ترکیبینده اولمایاجاق‌دیر. بو اویونچو سوپرجام یاریشماسیندا دا یوخ‌ایدی. اونون ترکیب‌ده اولماماسی‌نین نه‌دنی مصدومیت اولابیلر. آنجاق بوندان اؤنجه تراکتورون حاضیرلیق یاریشماسیندا وارایدی. آنجاق گؤرونن‌لره گؤره هله‌لیک مئیدانا گئده‌بیلمه‌یه‌جک.
سونگونون ائوی هاردادیر؟!
مس‌سونگون فوتبال تیمی‌نین سورون‌لاری هله ده یئرینده‌دیر. میزبانلیق اوچون یاخشی بیر ورزشگاهین اولماماسی اونلاری چوخ اینجیمیش‌دیر. اونلار کئچن فصل بوتون گوج‌لری‌له لیگین سهمیه‌سینی قوروماق اوچون چالیشمیش‌لار. اداره بؤلومونده باش وئرن ده‌ییشیک‌لیک‌لر ده اونلاری بو سورون‌لاردان قورتارا بیلمه‌میش‌دیر. سون ایل‌لرده اونلار تبریزین بنیان‌دیزل استادیوموندا حریف‌لرینه میزبانلیق ائتمیش‌لر. آنجاق ایندی یادگار استادیومو تعمیر اَلینده‌دیر. او اوزدن تراکتورون یاریشمالاری بنیان دیزل‌ده کئچیریله‌جک. او اوزدن سونگون، یاریشمالارینی کئچیرمک اوچون باغشمال استادیومونا گئتمک محبوریتینده اولاجاق‌دیر.
فدراسیون؛ آلوز سپاهانا اوینایا بیلمز
فوتبال فدراسیونونون سؤزچوسو ریکاردو آلوزین دورومو حاقدا یئنی بیلگی‌لر پایلاشمیش‌دیر:« اَلیمیزده اولان سندلره گؤره ریکاردو آلوز هله ده تراکتورون اویونچوسو ساییلیر. بو ایشین سوروملولوغو سپاهان باشگاهی‌نین بوینونادیر. آلوزین پرونده‌سی تراکتورون شکایتی اساسیندا وضعیت کمیته‌سینده آراشدیریلاجاق. آنجاق سونوندا ریکاردو آلوز پرونده‌نین سوروملولوغونو قبوللانمالی‌دیر. گؤرونن‌لره گؤره او فیفایا گئتملی‌دیر. او اوزدن سپاهان- ملوان یاریشماسیندا دا اولمایاجاق‌دیر.
عارف غلامی استقلالین نیمکتینده
تراکتورلا استقلالین بو گونکو یاریشماسیندا دیققت چکیجی بیر مسئله وارایدی. عارف غلامی تهرانلی تیمینده نیمکتینده اوتورموش‌‌ایدی. او تراکتوردان آیریلدیقدان سونرا استقلالا قوشولموش‌دور. غلامی بو باشگاه‌لا سؤزلشمه یازمیش‌دیر. اونون اویون کارتی دا وئریلمیش‌دیر. ساپینتو ایسته‌دییی زامان اونو مئیدانا گؤندره‌بیلر. آنجاق استقلال باشگاهی‌نین رسانه‌سی رسمی اولاراق بو حاقدا هئچ بیر پایلاشیم ائتمه‌میش‌دیر. بو اویونچونون استقلالا قاییتماسی سانال اورتام‌‌دا سؤز قونوسو اولموش‌دور. بونلارا رغمن باشگاه رسمی اولاراق غلامی‌نین تیمه قوشولماسی حاقدا هئچ بیر خبر پایلاشمامیش‌دیر.
یاریشما: رقابت، مسابقه
اؤنجه: قبل
بؤلوم: بخش
سورون: مشکل
سون: آخر پایان
سوروملو: مسئول
آراشدیرماق: بررسی کردن
قونو: موضوع
سؤزلشمه: قرارداد
سانال اورتام: فضای مجازی
نظرات (0)