خبر ترکی:
تراکتورون آسیا حریف‌لری بیر باخیش‌دا
تراکتور آسیا یاریشمالارینین ایلک آشاماسیندا سککیز تیم‌له گؤروشه‌جک‌دیر. السد‌قطر اونلارین ایلک حریفی‌دیر. اونلارین قهرمانلیق تجروبه‌سی ده واردیر. الشرطه عراق، مالی باخیمدان قروپون اَن گوجسوز تیمی‌دیر. شباب الاهلی امارات، سردار آزمون، تورکمن فوتبالچی بو تیمده چالیشماق‌دادیر. اوزبکیستان‌دان نسف‌قارشی، بو تیمین ده مادی ده‌یَری آزدیر. اونلار تراکتورا میزبانلیق ائده‌جک‌لر. الدحیل ، قطر لیگاسی‌نین ایکینجی تیمی، سپاهانین قاتیلی، تبریزده تراکتورا قوناق اولاجاق‌‌دیر. اماراتین الوحده تیمی اونلار امارات لیگاسیندا اوچونجو اولموش‌لار. اماراتین شارجه تیمی، نئچه فصل اؤنجه پلی‌آف آشاماسیندا تراکتورو اودموش‌دورلار. سون یاریشمادا تراکتور قطرین الغرافه تیمی ایله یاریشاجاق‌دیر.
سونگونون یئنی مالی جزاسی
حمید بی‌غم مس‌سونگون‌دن شکایت ائتدیینه گؤره فوتبال فدراسیونونون وضعیت کمیته‌سی بو باشگاها مالی جزا یازمیش‌دیر. اونلار ۶ میلیارد ۹۶۰ میلیون ریال جریمه اولموش‌لار . بوندان علاوه دادگاهین هزینه‌لرینه گؤره ۲۶۷ میلیون ۹۶۰ مین ریال بی‌غمه وئرمه‌لی‌دیرلر. مس‌سونگون باشگاهی بوندان اؤنجه اسماعیل تقی‌پور ایله علیرضا صمیمی‌نین بورجلارینی اؤده‌دیکدن سونرا آلیش وئریش‌لرینه باشلایابیلمیش‌دیر.
ریکاردو آلوز سوپرجام‌دا اوینایابیلردی
سعید مظفری‌زاده، تراکتور باشگاهی‌نین مودورو ریکاردو آلوزین تراکتوردان آیریلماغینا گؤره یئنی آچیقلاما وئرمیش‌دیر:« ریکاردو آلوز بیزیم اویونچوموزدور. او اوزدن هله ده بیزیم طرفیمیزدن دستکله‌نیر. آلوزله بیزیم سؤزلشمه‌میزواردیر. واختیندا اونون پولون دا وئرمیشیک. نئچه دفعه ده اونا زنگ ائدیب مشق‌لره قاتیلماسینی ایسته‌میشدیک. او تراکتورلا سؤزلشمه‌سینی پوزمامیش‌دیر. آنجاق بیردن بیره باشقا بیر تیمین کؤینه‌یی ایله شکیل پایلاشمیش‌دیر. تیر آیی‌نین ایلک گونو اونون سؤزلشمه‌سی رسمی شکیلده ثبت اولموش‌دور. سوپرجام‌دا بئله آلوز رختکنه گیرسه‌ایدی اونون آدینی تیمین لیسته‌سینده یازاردیق.»
استقلال تبریزه گلمک ایسته‌مه‌ییر
کئچن فصل تراکتور نساجی‌نین قارشیسیندا اوینادیقدان سونرا بو فصل‌ده بیرینجی یاریشماسی‌نین میزبانلیغیندان محروم اولموش‌دور. او اوزدن تراکتورلا استقلال‌ین یاریشما‌سی امام رضا استادیوموندا تماشاچی‌لار اولمادان کئچیریله‌جک‌ایدی. آنجاق استیناف کمیته‌سی یئنی حؤکمونده یاریشمانین یئرینی تبریز اعلان ائتمیش‌دیر. بو مسئله استقلال‌چی‌لارین اعتراضینا سبب اولموش‌دور. بو باشگاهین رسانه‌سی یاریشمانین تبریزده کئچیریلمه‌سی ایله مخالفت ائتمیش‌دیر.
یاریشما: رقابت، مسابقه
یئنی: جدید، تازه
دستک: کمک، حمایت
آچیقلاما: توضیح
مشق: تمرین
سؤزلشمه: قرارداد
باشقا: دیگر
اؤنجه: قبل
آشاما: مرحله
قروپ: گروه
ایلک: آغازین، ابتدایی
سون: آخر، پایان
نظرات (0)