تراکتورون ایلک آسیا یاریشماسی
آسیا داهیلر لیگاسینین اویونلاری شهریور آیینین ۲۴-جو گونوندن باشلایاجاقدیر. تراکتور ایلک یاریشماسیندا حریفیندن میزبانلیق ائدهجکدیر. او اوزدن بعضی سورونلارلا اوزاوزه اولابیلرلر. یادگار استادیومونون چمنی یاریشما زامانینا قدر حاضیر اولمایاجاقدیر. بئلهلیکله تراکتور ایلک یاریشماسینی باشقا استادیومدا کئچیرملی اولاجاقدیر. تراکتورچولار ورزشگاهین یاخشی بیر زاماندا حاضیر اولماسینی ایستهییرلر. اونلار سونراکی اویونلاردا تراکتورون بو سورونلا اوزهاوزه اولماماسینی اومید ائدیرلر.
استقلال بیرانوندی ایستهییر
استقلال باشگاهی گیزلی شکیلده علیرضا بیرانوندی آلماق ایستهییر. بیر سیرا رسانهلرین ادعاسینا گؤره بیرانوند ده استقلالا قوشولماق اوچون ماراقلیدیر. تهرانلی باشگاه زنوزینین رضایتینی آلماق پئشیندهدیر. حبیب فرعباسی استقلالین سون مشقلرینده انضباطسیزلیق ائتمیشدیر. آنجاق ریکاردو ساپینتو بو اویونچو ایله ایشلمک ایستهمهییر. استقلالین مودورلری ده فرعباسینی بیرانوندله دهییشمک ایستهییرلر. آنجاق تراکتورون مودورلری بو ایشله راضیلاشمامیشلار. بوندان علاوه علیرضا بیرانوند یاخشی بیر روحیه ایله تراکتورون مشقلرینه قاییتمیشدیر.
خداداد؛ تراکتور چوخ شانسلیدیر
بو گون آسیا داهیلر لیگاسینین پوشک آتما تؤرهنی کئچیریلمیشدیر. بئلهلیکله تراکتور آسیا یاریشماسیندا قارشیلاشاجاغی سککیز حریفی تانیمیشدیر. ایدئال بیر شکیلده عربستانلی تیملرین هئچ بیریسی اونلارین قارشیسینا چیخمامیشدیر. خداداد عزیزی بو حاقدا اؤز نظرینی بیلدیرمیشدیر:« منجه بوندان یاخشی اولابیلمزلیدی. گلن آشامایا گئتمک اوچون یوخاری شانسیمیز واردیر. عربستان تیملریله یاریشماق چوخ چتیندیر. اونلارین سویهسی آسیادان اوستوندور. اونلارین فوتبالی بیزیم فوتبالیمیزلا چوخ فرقلیدیر. آنجاق دئمهلییم داهیلر لیگاسیندا آسان یاریشما ویاخود آسان حریف ده یوخوموزدور.»
بیرانوند اوچون قورخو تونلی
علیرضا بیرانوندین دؤرد آیلیق مئیدانا گیرمکدن محروم اولسادا فیزیکسل دورومونو قوروماق اوچون بو گونلر تراکتورون مشقلرینه قاتیلمیشدیر. تیمین سون مشقینده تراکتورون اویونچولاری قورخو تونلی جورلایاراق بیرانوندی قارشیلامیشلار. اونلار بو شکیلده روحیهلرینی قوروماق ایستهییرلر. بیرانوند ده اونلارین بو ایشیندن اؤز صفحهسینده پایلاشیم ائتمیشدیر. تراکتورون قاپیچیسی محروم اولدوغونا رغمن تراکتورچولار طرفیندن یاخشیجا دستکلنمیشدیر.
ایلک: ابتدایی، آغازین
یاریشما: رقابت
باشقا: دیگری
سورون: مشکل
مشق: تمرین
ماراقلی: علاقمند
داهیلر لیگاسی: لیگ نخبگان
آشاما: مرحله
سویه: سطح
دوروم: موقعیت، وضعیت
قاپیچی: دروازهبان
دستک: کمک، حمایت
هر آخشام تورکجه ورزش اوخو (350)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)