مرکزچی رسانهلر تراکتورا قارشی
تراکتور سوپرجام یاریشماسیندا ایکی- بیره استقلال تیمینی اودموشدور. بو مسئله رسانهلرین ایلک تیترلری اولمالیایدی. آنجاق اونلار داها چوخ استقلالین اودوزماسینا اؤنم وئرمیشدیرلر. ائشیکده چالیشان فارس رسانهلری ده استقلالین بؤحرانیندان یازماغی سئچمیشلر. اونلار تراکتورون قهرمانلیغی حاقدا سسسیز قالمیشلار. آنجاق حاشیه ویاخود بؤحران زامانلاری تراکتورون آدینی ایلک تیترلرینده گتیریرلر. مرکزچی رسانهلر بو ایشلریله باشقا تیملرین باشاریلارینی کیچیلتمک ایستهییرلر. اونلار تراکتورون قهرمانلیغینا گؤز یوماراق عدالتسیزلیییه دوغرو آددیم آتماقدادیرلار.
ترابی سوپرجامدا پارلامیشدیر
مهدی ترابی، تراکتورون تجروبهلی اویونچوسو، سوپرجام یاریشماسیندا قول وورماسادا استقلالین دفاع خطینده چالیشان اویونچولاری چوخ اینجیمیشدیر. ترابی باش ضربهسی ایله توپو استقلالین داروازاسینا ووراراق اونلاری تهدید ائتمیشدیر. تراکتور علیرضا بیرانوندین پروندهسینین مسئلهسینده باغیشلانماق قارشیسیندا ترابینی پرسپولیسه وئرمک ایستهمهمیشدیر. ایندی ایسه بو اویونچو تراکتورون ترکیبینده پارلاماقدادیر. تراکتورون مودورلری ترابینی ساخلاماق قونوسوندا یاخشی توتوم توتموشلار. سوپرلیگانین یئنی فصلینده بو اویونچو یوخاری تجروبهسی ایله دراقان اسکوچیچ هابئله تراکتورا چوخ یاردیمجی اولاجاقدیر.
"تراکتورون قارشیسیندا استقلالین اویونوندان اوتاندیم"
استقلالین اَسکی اویونچوسو، جواد قراب، سوپرجام یاریشماسی حاقدا بئله دئمیشدیر:« استقلالین اَسکی اویونچوسو اولاراق استقلالین تراکتورون قارشیسیندا ائتدییی اویوندان اوتاندیم. استقلال یاریشمانین بیرینجی یاریسیندا ووردوغو قولدان سونرا دفاع فازینا گیرمیشدیر. تراکتور دا ایستهدییی ایشی گؤرموشدور. استقلالین اویونچولارینین آراسیندا هئچ بیر دوزَن یوخایدی. آنجاق تراکتورون هافبکلری بیزیم اویونچولاریمیزدان داها گوجلوایدیلر. استقلالین مهاجملری ده یاخشی اویون اوینامامیشلار. نازون بیر گون یاریشمادان اؤنجه تیمه قوشولموشدور. اونون مشق ائتمهدن مئیدانا گیرمهسی یانلیش بیر ایشایدی.»
تراکتورون ۵۰ میلیاردلیق سؤزلشمهلری
شجاع خلیلزاده، تراکتورون کاپیتانی، سوپرجامین قهرمانلیغی هابئله تراکتورون سون اولایلاری حاقدا دانیشمیشدیر:« استقلالین قولو بیر حادیثهیه باغلیایدی. بیز اونلارا قول وورماق اوچون موقعیت وئرمهدیک. ادیب ده یاخشی قاپیچیدیر. او یانلیش حرکتلر ائدهرهک تجروبه قازانمالیدیر. سونراکی یاریشمامیز دا چوخ فرقلیدیر. بیز قهرمانلیغین شنلیینی بیتیرمیشیک. ایندی بوتون دیققتیمیزله لیگین ایلک یاریشماسینی دوشونوروک. بیزیم باشگاهدا ۵۰ میلیاردان یوخاری سؤزلشمه یوخدور. هئچ بیر اویونچو تراکتوردا ۵۰ میلیاردان یوخاری آلابیلمز.»
مرکزچیلیک: مرکزگرایی
یاریشما: رقابت ، مسابقه
باشاری: موفقیت
قول: گل
یئنی: جدید
یاردیمجی: کمککننده
قونو: موضوع
اَسکی: قدیمی
قارشیسیندا: روبرویش
مشق: تمرین
قاپیچی: دروازهبان
سؤزلشمه: قرارداد
هر آخشام تورکجه ورزش اوخو (349)
نظرات (0)