خبر ترکی:
تراکتورون قولِرلری سوپرکاپا حاضیردیرلار
ویه‌کو میلتیچ سوپرکاپ یاریشماسیندان اؤنجه‌کی توپلانتی‌دا تیمین حاضیرلیغی حاقدا بئله دئمیش‌دیر:« بیز صبرسیزلیکله صاباحین یاریشماسینی گؤزله‌ییریک. فصلین ایلک گون‌لریندن دؤرد قاپیچی ایله مشق ائتمیشیک. بیرانوندین محروم اولماسی آنلاشیلیر. آنجاق باشقا قاپیچی‌لاریمیز حاضیردیرلار. بیرانوندین یوخلوغو ایلک باخیش‌دا پیس اولسا دا یاخشی سونوج‌لارا سبب اولابیلر. داروازانین ایچینده دوران هر قاپیچی بوتون گوجو ایله ساواشاجاق‌دیر. فصل‌دن سونرا اویونچولاریمیزین بیر نئچه‌سی آیریلمیش‌دیر‌لار. بیز ده ایران فوتبالی‌نین دورومونا گؤره یئنی اویونچولار آلمیشیق».
آلوزین کؤینه‌یینین نومره‌سی بوش قالمیش
تراکتور باشگاهی تیمین اسکوادینین یئنی کؤینک‌لرینی سرگی‌له‌میش‌دیر. الکس سدلار عارف غلامی‌نین کؤینه‌یی، دؤرد نومرهلی کؤینه‌یی گئیینه‌جک. میلاد کر دا کؤینه‌یینی ده‌ییشمیش‌دیر. بوندان سونرا بئشینجی نومره‌نی گئیینه‌جک‌دیر. یئددی نومره‌سی تیبور هالیلوویچین الینده اولدوغو اوچون مهرداد محمدی یئتمیش یئددی نومرهلی کؤینه‌یی گئیینه‌جک. آلوزین کؤینه‌یی یعنی اون نومرهلی کؤینه‌یین یئری بوش قالمیش‌دیر. دئمک تراکتور باشگاهی بو ایش‌له سپاهانا بیر شئی آنلاتماق ایسته‌ییر:« آلوز هله ده تراکتورون اویونچوسو ساییلیر».
سونگون‌له شناورسازی قشم‌ین چاتیشماسی
بو گون مس‌سونگون‌له شناورسازی قشم تیم‌لری حاضیرلیق اویونو کئچیرمیش‌‌لر. آنجاق یاریشمانین سونوندا باش وئرن چاتیشمالاردان دولایی اویونو یاریم‌چیق بوراخمیش‌لار. ایکی باشگاه فرقلی شکیلده اویونون سونوجون بیلدیرمیش‌لر. ایلک اولاراق شناورسازی تیمی سونگونون داروازاسین آچمیش‌دیر. سونرا دا مس اویونون مساوی قولون وورموش‌دور. آنجاق یاریشمانین سون آن‌لاریندا حاکیم قشم‌لی‌لره پنالتی توتدوغو زامان چاتیشما یارانمیش‌دیر. سونگونون اویونچولاری بو ایشدن سونرا مئیدان‌دان چیخمیش‌لار. ایکی تیمین اویونچولاری‌لا فنی‌کادلارینین آراسیندا چاتیشما یارانمیش‌دیر. سونگون یاریشمانین سونوجونو بیر-بیره، شناورسازی ده بیر- ایکی‌یه اعلان ائتمیش‌دیر.
استقلالین فنی‌کادری کنفرانسا گلمه‌دی
سوپرکاپ یاریشماسی صاباح اصفهانین نقش جهان استادیومون‌دا تراکتورلا استقلال تیم‌لرینین آراسیندا کئچیریله‌جک‌دیر. بو یاریشمادا سوپرلیگانین قهرمانی ایله حذفی کاپین قهرمانی فصلین بیرینجی کاپینی آلماق اوچون چالیشاجاق‌لار. انضباطی کمیته‌نین حؤکمونه گؤره ، استقلالین باش مشقچی‌سی اویوندان اؤنجه‌کی خبر کنفراسینا قاتیلماقدان محروم‌دور. آنجاق استقلالین فنی کادری‌نین یوخلوغو خبرنگارلاری شاشیرتمیش‌دیر. دئمک ساپیونونون یوخلوغوندا فنی کادرین باشقا اؤیه‌لری ده خبر کنفراسینا قاتیلماق ایسته‌مه‌میش‌لر. اونلار بو ایش‌لرینه هله بیر آچیقلاما وئرمه‌میش‌لر.
یاریشما: رقابت، مسابقه
اؤنجه: قبل
شاشیرماق: تعجب کردن
اؤیه: اعضا
آچیقلاما: توضیح
چاتیشما: درگیری
سونوج: نتیجه
اویون: بازی
یاریم‌چیق: ناتمام، نصفه نیمه
یئنی: جدید
قاپیچی: دروازه‌بان
ایلک: آغازین ابتدایی
دوروم: موقعیت، وضعیت
نظرات (0)