خبر ترکی:
شهرداری اورمییهنین تیمی گؤیلرده
شهرداری اورمییه والیبال تیمینین اویونچولارینین سؤزلشمهسی بو گونه قدهر ثبت ائدیلمهمیش. بو مسئله سون زامانلار دفعهلرجه تکرارلاندیغی اوچون یئنی حاشیهلرین یارانماسینا یئر آچمیشدیر. فصلین ایلگ گونلرینده، شهرداری اورمییه، عرشیا بهنژادی، اونون بورجونو اؤدهیه بیلمهدییی اوچون الدن وئرمیشدیر. اونلار یولون داوامیندا یئنی اویونچولار دا آلمیشلار. آنجاق بو اویونچولارین سؤزلشمهسی شهر شوراسی طرفیندن تأیید ائدیلمهمیش. باشگاهین مودورلری بو گونه قدر شورانین تأیید مکتوبونو آلابیلمهمیشلر. بونلارا رغمن اونلار فصلی قهرمانلیق شعاریلا باشلامیشدیرلار. آنجاق اونلارین سؤزلری ایله گئرچکلر آراسیندا چوخ آرا واردیر.
سوپرلیگانین اَن قیمتلی اویون کارتی
ریکاردو آلوزین سپاهانا قوشولماسی آلیش وئریش گونلرینین اؤنملی اولایلارینداندیر. بو مسئله تراکتورلا سپاهان باشگاهلارینین آراسیندا چاتیشمالارین یارانماسینا سبب اولموشدور. تراکتور باشگاهی بو مسئله حاقدا فیفایا شکایت یازمیشدیر. آنجاق سپاهان رسمی اولاراق بو اویونچونو باشگاهین یئنی آلیشی اولاراق تانیتدیرمیشدیر. آلوز سپاهانلا الدحیلین یاریشماسیندا مئیدانا گئدهبیلمهیهجکدیر. اونون یوخلوغونا فیزیکسل سورونلاری بهانه ائتمکلرینه رغمن باشقا بیر سورونلارین اورتادا اولماسی آیدیندیر. تراکتورون شکایتی تأیید اولورسا سپاهان مالی جزادان علاوه آلیش وئریشلردن ده محروم اولاجاقدیر. سپاهان تیمی آلوزه اویون کارتی آلماق اوچون چالیشماقدادیر.
خداداد؛ سپاهان گئتسین آلوزه کارت آلسین
خداداد عزیزی ، بو گون اؤزل بیر دانیشیقدا تراکتورون سون اولایلاری حاقدا آچیقلاما وئرمیشدیر.« بیرانوندله آلوزین دورومو بیر دئییلدیر. بیرانوند پرسپولیسله سؤزلشمهسینی پوزدوقدان سونرا تراکتورا قوشولموشدور. او تراکتورا قوشولدوغو زامان سؤزلشمهسی ثبت اولموشدور. اویون کارتی دا آلمیشدیر. بیرانوندین پروندهسی بو قدر بؤیوک اولساایدی اویون کارتی آلابیلمزایدی. آلوزله تراکتورون اوچ ایللیک سؤزلشمهسی واردیر. سپاهاندا باجاریرسا گئتسین آلوزه اویون کارتی آلسین».
وضعیت کمیتهسی یوخ تکجه فیفا
ریکاردو آلوز سؤزلشمهسینی تراکتورلا پوزمادان سپاهان باشگاهینا قوشولموشدور. تراکتور باشگاهینین مودورولری ده سپاهانلا آلوزدن شکایت ائدهجکلرینی بیلدیرمیشلر. بو مسئله ایکی ایرانلی باشگاهین آراسیندا اولدغو اوچون ایلک اولاراق وضعیت کمیتهسینده آراشدیریلمالیدیر. سونرا بو پرونده CAS دادگاهینا گؤندریلهبیلر. آنجاق تراکتور باشقا بیر توتوم توتموشدور. باشگاهین مودورلری آلوزدن فیفایا شکایت یازمیشلار. اونلارین ادعاسینا گؤره آلوز یابانچی بیر اویونچودور او اوزدن فیفا بو مسئلهنی آراشدیرمالیدیر. اونلار یابانچی بیر وکیل ایله ایش بیرلییی ائدهرهک سندلرینی فیفایا گؤندرمک ایستهییرلر.
سؤزلشمه: قرارداد
سون: آخر، پایان
ایلک: ابتدا، آغاز
گئرچک: واقعیت
اؤنملی: مهم
یئنی: جدید
سورون: مشکل
آراشدیرماق: بررسی کردن
یابانچی: خارجی
اؤزل: خاص، ویژه
باشقا: دیگر
هر آخشام تورکجه ورزش اوخو (344)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)