خبر ترکی:
ریکاردو آلوز سپاهانین مشقلرینده
ریکاردو آلوز سوپرلیگانین پورتاغاللی اولدوزو کئچن اوچ فصلده تراکتور تیمینده چالیشمیشدیر. آلوز بو گون سپاهانین مشقلرینده گؤرونموشدور. آنجاق تراکتور باشگاهینین مودورلرینین ادعاسینا گؤره بو اویونچونون تراکتورلا سؤزلشمهسی واردیر. سپاهان تیمینین مشقلریندن یایینلانان شکیللرده آلوز ده گؤرونمکدهدیر. سعید مظفریزاده بو مسئلهیه بئله تپکی گؤسترمیشدیر:« سپاهانا قارشی فیفایا شکایت آپارمیشیق. بیز بوتون گوجوموزله بو ایشین دالین توتاجاغیق. بو گون محمدرضا زنوزینین دئدیکلری تام دوغرویا چیخمیشدیر. سپاهان باشگاهینین مودورلری آلوزله ایلگیده اولمادیقلارینی ادعا ائتمیشدیرلر آنجاق ایندی هر شئی آیدیندیر».
مهدی کیانی آلوزه نه دئدی؟!
سپاهان باشگاهی ریکاردو آلوزله سؤزلشمه یازاراق آلیش وئریش گونلرینده های سالمیشدیر. بو مسئلهیه منفی تپکی گؤسترنلر شخصلرین سایی یوخاریدیر. تراکتورون اسکی اویونچولاری دا آلوزین ایشین نقد ائتمیشلر. مهدی کیانی ، تراکتورون اَسکی کاپیتانی اینستاگرام حسابیندا بو حاقدا پایلاشیم ائتمیشدیر. او یوز دولارلیق پولون شکیلینی پایلاشاراق اویونچولارین پولون قارشیسیندا نئجه داوراندیقلارینی گؤسترمک ایستهمیشدیر. او پولون قارشیسیندا تیملرینه وفاسیزلیق ائدن اویونچولارا بئله یازمیشدیر:« ذاتلی استوریلری آتمایین» . محمد ابراهیمی ده آلوزین ایشینه منفی تپکی گؤسترمیشدیر.
آلوز وضعیت کمیتهسینین یولوندا
ریکاردو آلوز سپاهانا قوشولدوقدان سونرا هامی اؤلکه فوتبالیندا یئنی بیر حقوقی ساواش گؤزلهمکدهدیر. چوخلاری آلوزین بو ایشینی بیرانوندین کئچن فصلینین پروندهسینه بنزهدیرلر. آنجاق بو ایکی مسئله فرقلیدیرلر. آلوز سؤزلشمهسینی بیر طرفلی اولاراق دا پوزماق ایستهمهمیشدیر. او تراکتورلا سؤزلشمه یازمادیغینی ادعا ائتمیشدیر. آنجاق تراکتورون مودورلری بو ادعانین یالان اولدوغونو بیلدیرمیشلر. ایندی ایسه امیرمهدی علوی، فدراسیونونون سؤزچوسونون دئدیکلرینه گؤره اونلار گلن هفتهنین ایلک گونوندن بو مسئلهنی آراشدیراجاقلار. اونون دئدییینه گؤره تراکتور شکایتینی یازیلی شکیلده هله فدراسیونا گؤندرمهمیش.
مشق: تمرین
سؤزلشمه: قرارداد
یایینلاماق: پخش کردن، منتشر کردن
پایلاشماق: منتشرکردن
تپکی گؤسترمک: واکنش نشان دادن
داورانیش: رفتار
اؤلکه: کشور
سؤزچو: سخنگو
آراشدیرماق: بررسی کردن
اَسکی: قدیمی
هر آخشام تورکجه ورزش اوخو (343)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)