خبر ترکی:
آلوزین سؤزلشمه‌سی صلاحیت کمیته‌سینده
ریکاردو آلوز تراکتورلا اوچ فصل سؤزلشمه‌سی اولارکن بو گون سپاهان‌لا ایکی ایللیک سؤزلشمه یازمیش‌دیر. او سؤزلشمه‌سینی قانون‌سوزجا پوزموش‌دور. محمدعلی قدوسی فوتبال فدراسیونونون حقوق بؤلوموندن بو حاقدا بئله دئمیش‌دیر:« بو مسئله حاقدا فدراسیونون قضایی بؤلومو نظر وئرمه‌لی‌دیر. او اوزدن اؤز باشیما بو حاقدا دانیشماغیم قانون‌سوزلوق‌دور. وضعیت کمیته‌سی دیققتلی شکیلده آلوزین دورومونو هابئله سپاهانا قوشولماق مسئله‌سینی آراشدیرمالی‌دیر».
دبیر؛ تراکتور پئشه‌کار بیر باشگاه‌دیر
علیرضا دبیر بو گون مشهدده بیر گولشمک ائوینین آچیلیشیندا باشگاه‌لارین هزینه‌لرینه گؤره بئله دئمیش‌دیر:« دؤولت هابئله دؤولته باغلی اولان قوروم‌لارین قهرمانلیق ورزش‌لری ساحه‌سینده چالیشماق‌لاری قانون‌سوزلوق‌دور. دؤولت بئله یئرلره هزینه ائتمه‌مه‌لی‌دیر. اؤرنک اوچون فوتبال‌دا سپاهان‌لا ذوب‌آهن تیم‌لرینین پولو هاردان گلیر؟ اونلارین هزینه‌لرینی دؤولت اؤده‌ییر. آنجاق تراکتور دوزگون بیر باشگاه‌دیر. نییه کی اؤزل بیر شخص طرفیندن هزینه‌لری اؤده‌نیلیر. تراکتور پئشه‌کار بیر باشگاه اوچون یاخشی اؤرنک‌دیر.»
تراکتور آلوز ایله سپاهان‌دان شکایت ائتدی
نئچه ساعات اؤنجه سپاهان باشگاهی ریکاردو آلوز ایله سؤزلشدییینی بیلدیرمیش‌دیر. آنجاق تراکتور باشگاهی‌نین ادعاسینا گؤره اونلارین بو اویونچو ایله اوچ ایللیک سؤزلشمه‌لری واردیر. سعید مظفری‌زاده بو حاقدا بئله دئمیش‌دیر:« بو اویونچو رسمی شکیلده تراکتورلا اوچ ایللیک سؤزلشمه یازمیش‌دیر. بو سؤزلشمه اعتبارلی‌دیر. بیز ایلک اؤده‌نیش‌لر ده بو اویونچونون حسابیندا یاتیریلمیش‌دیر. هابئله مشق‌لره قوشولماق اوچون اونا بلیت ده آلینمیش‌دیر. بیز دفعه‌لرجه اوندان تیمه قاییتماسینی ایسته‌دیک آنجاق سونوندا شکایتیمیزی فیفایا گؤندرمک مجبوریتینده قالدیق. هابئله بو گون سپاهان باشگاهیندان دا ائتدییی قانون‌سوزلوق‌‌لار اوچون شکایت ائتدیک.»
شجاع؛ آپاریجی‌لار منه قارشی دانیشیرلار
شجاع خلیل‌زاده بو گون اؤزل بیر دانیشیق‌دا تراکتورون مسئله‌لری هابئله اؤز دورومو حاقدا دانیشمیش‌‌دیر:« عارف آقاسی ایله ریکاردو آلوز تیمدن آیریلدیق‌لارینا رغمن تیمین تمل ترکیبی قورونموش‌دور. قهرمانلیق چتین‌دیر آنجاق قهرمانلیغی تکرارلاماق داها دا چتین‌دیر. بیز بیرلیکده آسیا سویه‌سینده ده باشاریلی اولابیلریک. میللی رسانه‌ده اؤزل بیر آپاریجی منه قارشی بیر سیرا سؤزلر دئمیش‌دیر. من اؤز چالیشمالاریمین سونوجون آلمیشام. بیر چوخ‌لاری فوتبالچی‌لار نه قدر چتین‌لیک چکدیک‌لرینی آنلامیرلار. ۳۶ یاشیمدا توپ اویناییرامسا اَسکی‌دن چوخ زحمت چکمیشم. او اوزدن سایغی ایله داورانمالی‌دیرلار.»
اَسکی: قدیمی
سویه: سطح
اؤزل: خاص، ویژه
سایغی: احترام
دوروم: موقعیت، وضعیت
تمل: اصل
سؤزلشمه: قرداد
سونوج: نتیجه
مشق: تمرین
اؤده‌مک: پرداخت کردن
آراشدیرماق: بررسی کردن
داورانیش: رفتار
باشاریلی: موفق
پئشه‌کار: حرفه‌ای
آپاریجی: مجری
هر آخشام تورکجه ورزش اوخو (342)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
نظرات (0)