بیرونون یئرینده کیم دوراجاق؟!
تراکتور باشگاهی کئچن ایکی هفتهده علیرضا بیرانوندین یئرینده داروازادا دورابیلن قاپیچی آختارماقدادیر. دراقان اسکوچیچ، آنتونی ماندرئا، الجزایرین میللی تیمینین قاپیچیسینی باشگاها اؤنرمیشدیر. ماندرئا ۲۸ یاشیندادیر. فرانسهنین کان تیمینده چالیشماقدادیر. الجزایرین میللی تیمینده الکسیس گندوزدان سونرا ایکینجی قاپیچیدیر. کئچن فصل کان تیمینده ۲۶ یاریشمادا ۴۴ قول توتموشدور. او کان تیمیله بیرلیکده اؤلکهلرینین اوچونجو سویه لیگاسینا یئنمیشدیر. تراکتور بو اویونچونو آلماق اوچون فرانسهنین کان باشگاهیندان رضایت آلمالیدیر.
آلوز سپاهانا قوشولماق حاقیندا دوشونور
سپاهان سون گونلرده ریکاردو آلوزی اصفهانا آپارماق اوچون چالیشماقدادیر. اونلار بو اویونچو ایله دانیشیق دا آپارمیشلار. آنجاق ایکی طرف هله آنلاشا بیلمهمیشلر. آلوز سپاهانین سوروملولاریندان سون قرارینی وئرمک اوچون زامان ایستهمیش. آنجاق تراکتور باشگاهینین ادعاسینا گؤره آلوز بو تیمله سؤزلشمه یازمیشدیر. او اوزدن باشقا تیمه قوشولماقلا باشگاه بو اویونچودان شکایت ائدهبیلر. آنجاق آلوزین دئدیکلرینه گؤره اونونلا تراکتورون سؤزلشمهسی رسمی شکیلده و دوزگون زامانیندا یازیلمامیشدیر. او اوزدن ایستهدیییی تیمه قوشولابیلر
کاوه رضایی تراکتورو محکوم ائتدی!
کاوه رضایینین تراکتوردان شکایت ائتدیینه گؤره انضباطی کمیته باشگاهی محکوم ائتمیشدیر. بو حؤکمه گؤره تراکتور ۲۱ میلیارد ۵۲۰ میلیون جریمه اؤدهمهلیدیر. بوندان علاوه ۸۲۸ میلیون دا دادگاهین هزینهلرین وئرملیدیر. رضایی استقلال باشگاهین دا محکوم ائتمیشدیر. اونلار دا ۱۰۰ میلیارد بو اویونچونون اصل ایستهیینه گؤره هابئله ۳ میلیارد ۸۵۰ میلیون دا دادگاهین هزینهلرینه گؤره بو اویونچویا وئرملیدیرلر.
دانیال ایله ترابینین حاشیهلری بیتدی
علیرضا بیرانوندین پروندهسینین حؤکمو گلمهدن اؤنجه تراکتورلا پرسپولیس باشگاهلاری باشقا یوللاردان آنلاشماق اوچون چالیشمیشدیرلار. رضا درویش ده بیرانوندی باغیشلاماغین قارشیسیندا دانیال اسماعیلیفر ایله مهدی ترابینین پرسپولیسه قوشولماغینی ایستهمیشدیر. آنجاق زنوزی بو مسئلهنی قبوللانمامیشدیر. ترابی ایله دانیال دانیشیقلاریندا تراکتوردا قالاجاقلارینی بیلدیرمیشدیرلر آنجاق درویش، ترابینین پرسپولیسه قاییتماق اوچون ماراقلی اولدوغونو ادعا ائدیر. بیرانوندین حؤکمو گلدیکدن سونرا بو بحثلر ده اورتادان قالدیریلمیشدیر.
قاپیچی: دروازهبان
اؤنرمک: پیشنهاد دادن
یاریشما: رقابت
سَویه: سطح
سون: آخر،پایان
آنلاشماق: توافق کردن
سؤزلشمه: قرارداد
سوروملو: مسئول
ماراقلی: علاقمند
اورتادان قالدیرماق: از میان برداشتن
باشقا: دیگر
هر آخشام تورکجه ورزش اوخو (338)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)