تراکتورون یئنی قاپیچیسی لالیگادان
تراکتور باشگاهی آلیش-وئریش گونلرینین داوامیندا یئنی بیر قاپیچی آختارماقدادیر. علیرضا بیرانوندین پروندهسینین سونوجونو بللی دئییلدیر. هابئله یاریشمالارین دال با دال اولدوغو اوچون ایکی باجاریقلی قولئرین تیمده اولماسی گَرَکلیدیر. حسین حسینینین تراکتورا قوشولماق پروندهسی باغلاندیقدان سونرا ایندی یابانچی بیر قاپیچینین آدی تیمین آلیش وئریش لیستهسینده گؤرونمکدهدیر. ویسنته گوایتا، تجروبهلی، اسپانیالی قولئر، کئچن فصل سلتاویگو تیمینین ترکیبینده مئیدانا گئتمیشدیر. بوندان اؤنجه والنسیا، ختافه، کریستال پالاس تیملرینده چالیشمیشدیر.
ساپینو سوپرجامدا اولاجاقمی؟
سوپرجام یاریشماسی یاخلاشیق ایکی هفته سونرا تراکتور و استقلال تیملرینین آراسیندا کئچیریلهجکدیر. آنجاق استقلالین مشقچیسی، ریکاردو ساپیونونون دورومو هله بللی دئییل. ساپینو بو یاریشمادا استقلالین نیمکتینده اوتورابیلهجکمی؟
ساپینو دؤرد آیلیق محروم اولدوغو اوچون مئیداندا تیمینین یانیندا اولابیلمهیهجک. استقلالچیلارین بو محرومیتین باغیشلانماسینی گؤزلهییرلر. بو پورتاغاللی مشقچی فصلین ایلک یاریشماسیندا استقلالین نیمکتینده اوتورماقدان محرومدور. سوپرجام یاریشماسی مرداد آیینین ۲۰-جی گونو تراکتور( سوپرلیگانین قهرمانی)، استقلال ( حذفی کاپین قهرمانی) آراسیندا اصفهان شهرینده کئچیریلهجکدیر.
تراکتور ۶۰ گون ائویندن اوزاق اولاجاق!
تراکتور باشگاهینین سوروملولاری بؤلگهنین ورزش سوروملولاریلا بیرلیکده یادگار استادیومونون چمن سورونونو آرادان قالدیرماق اوچون ایشبیرلییی ائدیرلر. اَلده ائدیلن بیلگیلره گؤره استادیومون چمنی هله ده سریلمهمیشدیر. او اوزدن تراکتور فصلی ائویندن اوزاق بیر یئرده باشلامالیدیر. استادیومون تورپاغی دهییشیلدیکدن سونرا چمنلر سریلمهلیدیر. آنجاق چمنین جوجرمهسی یاخلاشیق آلتی هفته سورهجکدیر. بوندان علاوه چمنین ترمیم سورهجی ده واردیر. دئییلنلره گؤره صاباحدان چمن سرمک سورهجی باشلایاجاقدیر. او اوزدن تراکتور ۴۵-۶۰ گون یادگار استادیوموندان اوزاق اولاجاقدیر.
قاپیچی: دروازهبان
یئنی: جدید، تازه
سونوج: نتیجه
یاریشما: رقابت، مسابقه
یابانچی: خارجی
یاخلاشیق: تقریبا
سوروملو: مسئول
سورهج: فرآیند
سورون: مشکل
آرادان قالدیرماق: برطرف کردن، از بینبردن
بؤلگه: منطقه
نظرات (0)