خبر ترکی:
چمن ده‌ییشمک سوره‌جینده بیر یانلیش‌لیق
تراکتور باشگاهی تورکییه‌لی بیر شیرکتین یاردیمی ایله یادگار استادیومونون چمنی‌نی ده‌ییشمک ایستهییر. آنجاق بو سوره‌ج‌ده بیر یانلیش‌لیق باش وئرمیش‌دیر. او اوزدن چمن سَرمک ایشی یوبانمیش‌دیر. دئمک استادیومون تورپاغی چمن اوچون دوزگون بیر شکیلده حاضیرلانمامیش. تورپاغین بیر چوخ بؤلومو رُس‌دان (گیل) اولوشموش‌دور. بو دوروم هیبریدی چمن‌لری بئجرتمک اوچون اویغون دئییل. بئله‌لیکه ایلک اولاراق استادیومون تورپاغی ده‌ییشیلمه‌لی‌دیر.
تراکتورچولارین سئودییی اویونچو قطرده
اشکان دژاگه اؤلکه‌نین آدلیم فوتبالچی‌لاریندان بیری‌دیر. دژاگه ایل‌لر بویو آلمان‌لی تیم‌لرده هابئله تراکتوردا چالیشمیش‌دیر. بو اویونچو تراکتورلا حذفی کاپین قهرمانلیغینی قازانمیش‌دیر. تی‌تی‌لرین آراسیندا دا چوخ سئویلیر. ۳۹ یاشلی دژاگه، فوتبال ایله ویداع‌لاشمیش‌دیر. آنجاق ایندی قطرین لوسیل باشگاهی بو اویونچونو تیمین کؤمکچی مشقچی‌سی اولاراق تانیتدیرمیش‌دیر. باشگاهین مودورو اشکان دژاگه حاقیندا بئله دئمیش‌دیر:« بئله یئتنکلی بیری ایله ایش بیرلییی ائده‌جه‌ییمیز اوچون چوخ موتلویام. اونون بیزه چوخ یاردیمجی اولاجاغینا اینانیریق».
فدراسیونونون گیزلی اوتورومو بیرو حاقدا
تراکتورلا پرسپولیس‌ین پرونده‌سی یاخلاشیق اون‌اوچ آی‌دیر بلیرسیز بیر دوروم‌دا‌دیر. سون زامان فوتبال فدراسیونو بو حاقدا گیزلی بیر اوتوروم کئچیرمیش‌دیر. پرسپولیس باشگاهی‌نین سؤزچوسو بو اوتوروم حاقدا آچیقلاما وئرمیش‌دیر:« پرسپولیس باشگاهی تراکتورلا آنلاشماق اوچون مهدی ترابی‌نی ایستهییر. بیز ده فدراسیونونون اوتوروموندا بو مسئله‌نی تراکتور باشگاهی‌نین قولاغینا چاتدیردیق. آنجاق اونلار آنلاشما قارشیلیغیندا بیزه پول اؤنردیلر. درویش ده بو مسئله ایله مخالف اولدوغونو اوردا اعلان ائتمیش‌دیر. او اوزدن ایکی باشگاهین آنلاشماسی ایمکان‌سیز اولموش‌دور».
چیرکین بیر سناریو بیرو ایله تراکتورا قارشی
استیناف کمیته‌سی بو گونه قده‌ر علیرضا بیرانوندین پرونده‌سی‌نین سونوجونو اعلان ائتمه‌میش‌دیر. آنجاق میللی رسانه‌ده چالیشان بیر سیرا آپاریجی‌لار پرونده‌نین حؤکمو حاقدا قطعی نظرلر وئرمیش‌لر. اونلارین بو داورانیشی اخلاق‌دان اوزاق‌دیر. بئله بیلگی‌لر گیزلی ساخلانیلمالی‌دیر. دئمک فوتبالین قضا سیستمینده سورون‌لار واردیر. و یاخود رسانه ایله بیر اؤزل باشگاه پرونده‌نین سونوجونو ائتکی‌لمک اوچون بئله ایش‌لره اَل آتمیش‌لار. بو ایش‌لرین قارشیسیندا سس‌سیز قالماق سیستماتیک بیر فسادین سیمگه‌سی‌دیر.
سیمگه: نشانه
بیلگی: اطلاعات، دانش
سونوج : نتیجه
اؤزل: ویژه، خاص
آنلاشما: توافق
سؤزچو: سخنگو
دوروم: موقعیت، وضعیت
اوتوروم: جلسه، نشت
یئتنکلی: با استعداد
مشقچی: مربی
یاردیمجی: کمک‌کننده
آدلیم: مشهور، شناخته شده
اویغون: مناسب
یانلیش‌لیق: اشتباه
هر آخشام تورکجه ورزش اوخو (335)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
نظرات (0)