ایکی بوش یئر اوچون اسکونون سئچهنکلری
تراکتور آلیش-وئریش گونلرینده باشاریلی اولموشدور. آنجاق تیمین ترکیبینده ایکی بوش یئر واردیر. علیرضا بیرانوند نه قدر یاخشی قاپیچی اولسا دا تیمین باشقا ایکی قاپیچیسی تجروبهسیزدیرلر. او اوزدن تیمه ایکینجی بیر قولِر ده لازیمدیر. اسکوچیچ فرجیله سدلاری آلاراق دفاع خطینین سورونلارینی آرادان قالدیرمیشدیر. ریکاردو آلوز تیمدن آیریلدیقدان سونرا تراکتور ایکی هافبک اونون یئرینه آلمیشدیر. آنجاق دراقان باشقا بیر هافبک ده آلابیلر. وینگرلر خطینده اویونچولار آراسیندا یوخاری سویهده یاریشما واردیر. آنجاق حمله خطینده بیر مهاجم اویونچو آلماق تراکتورون اؤنملی آماجلارینداندیر.
تراکتور-یادگار؛ پاییز بیرلشمهسی
یادگار استادیومونون چمن دهییشمک سورهجی داوام ائتمکدهدیر. او اوزدن تراکتور تیمی ایلک هفتهلرین یاریشماسیندا هوادارلاریندان اوزاق اولاجاقدیر. هیبریدی چمنلر تورکییهدن تبریزه گتیریلمیشدیر. تورک اوزمانلارین نظارتیله چمن دهییشمک ایشلری قاباغا گئتمکدهدیر. حبیب مقصودینین دئدیکلرینه ایشین سونونا ۴۵ گون قالمیشدیر. او اوزدن تراکتور بنیاندیزل استادیوموندا حریفلرینی قارشیلاشاجاقدیر. بیرینجی هفتهنین اویونو انضباطی کمیتهنین حؤکمونه گؤره تبریزدن اوزاق کئچیریلهجک. اوچونجو و بئشینجی هفته آلومینیوم اراک و فجرسپاسی تیملریله گؤروشهجک. بو ایکی اویون بنیان دیزل استادیوموندا اولاجاقدیر.
بیرو- ساپینو؛ استقلالچیلارین ایستهیی
فوتبال فدراسیونونون مودورلرینین دئدیکلرینه گؤره علیرضا بیرانوندین پروندهسینین سونوجونو یئنی فصل باشلانمادان اؤنجه بللی اولاجاقدیر. شایعهلره گؤره پرسپولیسله تراکتورون آنلاشمادیغی حالدا بیرانوند دؤرد آی محروم اولاجاقدیر. استقلالچیلار بو مسئلهنی قوللاناراق ریکاردو ساپیونونون محرومیتینی آرادان قالدیرماق ایستهییر. استقلالین هوادارلارینین نظرینه گؤره بیرانوند محروم اولماسا اونلارین باشمشقچیسی ده محروم اولمامالیدیر. اونلار سوپرجام یاریشماسیندا ساپیونونون نیمکتده اوتورماسینی ایستهییرلر. ساپینو ۱۴۰۲-جی ایلین خرداد آییندا حذفی کاپدا باش وئرن اولایلاردان دولایی دؤرد آی محکوم اولموشدور. یاسالارا گؤره اَن آزی بو حؤکمون یاریسی ایجرا اولونمالیدیر.
پرسپولیس؛ آنلاشما یوخ تکجه ترابی
پرسپولیس باشگاهینین سؤزچوسو پرسپولیسله تراکتورون بو گونه قدر آنلاشا بیلمهدیکلرینی بیلدیرمیشدیر. او بو حاقدا بئله دئمیشدیر:« بیزیم اوچون باشگاه مودورلرینین ایستهیی اؤنملیدیر. دفعهلرجه فدراسیوندان رأیین وئریلمهسینی ایستهمیشیک. آنجاق حؤکم گلمهدییی اوچون آنلاشما مسئلهسی اورتایا چیخمیشدیر. بو ایستک پرسپولیس باشگاهی طرفیندن اولمامیشدیر. آنجاق مودورلریمیز تراکتورلا آنلاشمانین قارشیلیغیندا تراکتورون اؤزل بیر اویونچوسونو( مهدی ترابی) ایستهمیشلر. تراکتور دا بو ایستهییی رد ائتمیشدیر. اونلار پروندهنین باغلانماسی اوچون باشگاها پول وئرمک ایستهمیشلر آنجاق بیز ده بو ایشی قبوللانمادیق».
سئچهنک : گزینه
باشاریلی: موفق
قاپیچی: دروازهبان
باشقا: دیگر
سورون: مشکل
یاریشما: رقابت، مسابقه
اؤنملی: مهم
سویه: سطح
سورهج: فرآیند
اؤنجه: قبل
سونوج: نتیجه
سؤزچو: سخنگو
آنلاشماق: توافق کردن
اؤزل: خاص، ویژه
هر آخشام تورکجه ورزش اوخو (333)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)