آذربایجان اوغلو، رونالدودان اوستوندور
۲۰۲۵ والیبال میللتلر لیگاسینین ایلکین آشاماسی اوچ هفته یاریشمادان سونرا باشاچاتمیشدیر. اؤلکهنین میللی تیمی آلتی اویونو اوداراق جدولین سککیزینجی سیراسیندا دایانمیشدیر. آنجاق ایکی آذربایجانلی اویونچو بو یاریشمالاردا پارلامیشلار. مرتضی شریفی، اورمییهلی اویونچو، ووردوغو سرویسلردن ۱۸ امتیاز قازاناراق سرویس وورانلار آراسیندا اوچونجو اولموشدور. امین اسماعیلنژاد ملککندلی اویونچو دا حمله خطینده چوخ یاخشی اویون اوینامیشدیر. او ووردوغو اسپکلرین بیرینده ۳متر ۸۰ سانت توللانماقلا آدینی تاریخده یازمیشدیر.
تراکتورون چمنی ده خاریجی اولدو
محمدرضا زنوزی اویونچولارینی یابانچی اؤلکهلردن آلدیقدان سونرا تراکتورون چمنلرینی ده ائشیکدن گتیرمیشدیر. سون ایللرده یادگار استادیومونون چمنی چوخ پیس دورومداایدی. بو مسئله دفعهلرجه اویونچولار هابئله مشقچیلر اوچون سورون یاراتمیشدیر. ایکی ایل گؤزلهدیکدن سونرا استادیومون یئنیلمک سورهجی باشلایاجاقدیر. ایندی ایسه هیبریدی چمنلر اَسکی چمنلرین یئرین آلاجاقدیر. بو نؤوع چمنلر دونیانین بیر چوخ تانینمیش ورزشگاهلاریندا دا ایشه آلینمیشدیر.
شجاع اورمو گؤلونون قوروماسینا تپکی گؤستردی
شجاع خلیلزاده تراکتورون کاپیتانی، سون گونلر تیمله بیرلیکده تورکییهده مشق ائتمکدهدیر. بو اویونچو اینستاگرام صفحهسینده اورمو گؤلونون قوروماسینا گؤره بیر شکیل ایله قیسا جومله پایلاشمیشدیر. او اورمو گؤلونون پیس دورومونا عایید اولان بیر شکیل پایلاشاراق بئله یازمیشدیر:« دونیانین بؤیوک شور گوللریندن بیری، آجیوئریجی بیر دورومدادیر. اورمو گؤلو.» شجاع خلیلزاده سؤزلرینین داوامیندا بئله یازمیشدیر:« اورمو گؤلونو سو ایله دولو گؤرمک اومیدیله.»
تراکتورون یئنی کاپیتانی کیمدیر؟!
تراکتور تیمی، شجاع خلیلزادهنین کاپیتانلیغی ایله ایکی یاخشی فصلی کئچیرمیشدیر. شجاع یاریشمالارین بیر چوخوندا تیمین اصلی ترکیبینده یئرآلمیشدیر. او تیمده اولمایان چاغلار دا ریکاردو آلوز اونون یئرینی دولدوروردو. محمد قنبری ده تیمین اوچونجو کاپیتانیایدی. ایندی ایسه قنبری تراکتوردان آیریلمیشدیر. آلوزدن ده خبر یوخدور. شجاعلا اسکوچیچ ایندی تیمین یئنی کاپیتانلاری سئچملیدیرلر. دانیال اسماعیلیفرین یاشی هابئله تیمده چالیشماق سابیقهسینی نظرده آلاراق او ایکینجی کاپیتان اولاراق سئچیلمیشدیر.
هر آخشام تورکجه ورزش اوخو (328)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)