پرسپولیسین اویونچولاری بیرونون آرخاسیندا
مهدی تاج، فوتبال فدراسیونونون باشچیسینین دئدییینه گؤره پرسپولیسین اَسکی اویونچولاریندان ایکیسی، مهدی ترابیله دانیال اسماعیلیفر، علیرضا بیرانوندین نفعینه شاهید کئچمیشلر. اونلار سؤزلشمهدن قیراق پرسپولیس باشگاهیندان پول آلدیقلارینی بیلدیرمیشلر. بو سؤزلر بیرانوندین پروندهسینده چوخ یاردیمجی اولابیلر. بو مسئله یاخلاشیق ۴۰۰ گون تراکتور و پرسپولیس باشگاهلارینین باشین قاتمیشدیر. او اوزدن بئله سورونلارلا اوزاوزه اولماماق اوچون بوندان سونرا سؤزلشمهلرین داها دیققتلی یازیلماسی گَرَکلیدیر.
پول قهرمانلیق گتیرمز
ایران سوپرلیگاسیندا چالیشان تیملر مالی آمارلار باخیمدان چوخ فرقلی دورومدادیرلار. قهرمانلیق آدایلاری آراسیندا اَن آز هزینه ائدن تیم، تراکتور، قهرمانلیق عونوانینی قازانمیشدیر. اونلارلا سپاهان، پرسپولیس، استقلال تیملری آراسیندا یاخلاشیق ۲۰۰ میلیاردلیق آرا واردیر. تراکتور بو بودجه ایله یاخشی اویونچولار تیمه گتیرمیشدیر. او اوزدن بو فصل ده محمدرضا زنوزی اورتا سویهلی یئرلی اویونچولاری یوخاری رقملرله آلماق یئرینه داها آشاغی رقملرله ائشیکدن کیفیتلی اویونچو آلمیشدیر. آنجاق باشقا تیملر داها یوخاری هزینهلرله بو سونوجلاری قازانا بیلمهمیشلر.
پوستونسکی؛ نهدن بیرونون اَلین اوپدوم!
ایقور پوستونسکی، تراکتورون قهرمانلیغیندا چوخ اؤنملی رول اوینامیشدیر. کئچن فصل یاریشمالارین بیرینده او علیرضا بیرانوندین اَلین اوپموشدور. پوستونسکی سون دانیشیغیندا بو حاقدا آچیقلاما وئرمیشدیر:« من بو ایشی تیمیمیزده چالیشان اویونچویا دستک اولماق اوچون گؤردوم. ائله زامانلار وارکی اینسان باشقاسی طرفیندن حمایت اولماق ایستهییر. بیرانوند او دقیقهلر ایچینده ایکی اؤنملی توپو توتموشایدی. من یاریشمانین حساس آنلاریندا اونا روحیه وئرمک ایستهدیم.»
ماشین نارینجی تئمله قاییداجاق!
مسسونگون فوتبال تیمینین سهمیهسی ماشینسازییه وئریلهجک. بو مسئله دوغو آذربایجانین والیسی طرفیندن اورتایا قویولموش. سونگون باشگاهینین مودورلری ده بو ایلک آشامادا بو ایشله راضیلاشمیشلار. بو باشگاهین فوتبال تیمی سون ایکی ایلده یاخشی سونوجلار الده ائتمهمیشدیر. بو ایل ده بودجه باخیمیندان سورون یاشاییرلار. بو دورومدا بئله بیر آل-وئر هر ایکی طرفین نفعینه اولابیلر. ماشینسازی سون ایللرده فرقلی قوروملارا هابئله فرقلی شخصلره تاپشیریلمیشدیر. سونوندا ۱۴۰۳-جو ایلده باشگاهین یییهسی بو تیمین داغیلماق خبرینی وئرمیشایدی.
هر آخشام تورکجه ورزش اوخو (327)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)