خطیبی مس رفسنجانا قوشولدو
رسول خطیبی، تبریزلی باشمشقچی، کئچمیشده تراکتور، گسترش فولاد، ماشینسازی، آلومینیوم اراک تیملرینده چالیشمیشدیر. ایندی ایسه مس رفسنجان تیمینین رهبرلیینی اَله آلمیشدیر. سون ایللرده خطیبی سایپا، پیکان، مسسونگون باشگاهلاریندا مودور اولاراق چالیشمیشدیر. او ایکی ایل مشقچیلیکدن اوزاق قالدیقدان سونرا یئنیدن نیمکته قاییتمیشدیر. بوندان اؤنجه خطیبی اورمییهنین نود تیمیله ده دانیشیق آپارمیشدیر. آنجاق سونوندا مسرفسنجانین رهبرلییینی اَله آلاراق سوپرلیگه قاییتمیشدیر.
تراکتورون آدینا یارانان شایعهلر
کئچن گون بیر سیرا رسانهلر سیدحسین حسینی، استقلالین قاپیچیسینین تراکتورا قوشولماغی حاقدا شایعهلر یایینلامیشلار. بو خبر یایینلانمانیشدان اؤنجه استقلالچیلار حسینینین تیمدن آیریلماغینی ایستهییردیلر. آنجاق اونون تراکتورا قوشولماق خبری اورتایا گلدیکدن سونرا هوادارلارین نظری دهییشمیشدیر. ایندی اونلار استقلال باشگاهیندان حسینینین تیمده ساخلانماسینی ایستهییرلر. بو مسئله سون ایللرین تانیش حئکایهلریندندیر. اویونچولار تراکتورا قوشولماق حاقدا شایعهلر یایینلایاراق اؤز رقملرینی یوخاری آپارمیشلار.
تاج بیرونون پروندهسی حاقدا دانیشدی
کئچن گون علیرضا بیرانوند، تراکتورون قاپیچیسی، بیر قیسا ویدیو پایلاشاراق پرسپولیسین مودورلری و هوادارلاریندان عوذر ایستهمیشدیر. هابئله تراکتور باشگاهینا اونا یاردیمجی اولدوقلاری اوچون تشککورونو بیلدیرمیشدیر. ایندی ایسه مهدی تاج، فوتبال فدراسیونونون باشچیسی، بو پرونده حاقدا یئنی بیلگیلر وئرمیشدیر:« اوزمانلیق بؤلومونده باش وئرن سورونلاردان دولایی بو پروندهنین حؤکمو یوبانمیشدیر. ایکی باشگاهین آنلاشماسی و یاخود پروندهنین سونوجو بللی اولاجاقدیر. اؤز نظریم بیرانوندین ایشینه گؤره مثبتدیر».
گنجلر بیرلییی، تراکتورون تورکییهلی حریفی
تراکتور باشگاهینین بیلدیریسینه گؤره تیمین اوردوسو تورکییهنین بولو شهرینده داوام ائدهجک. تیر آیینین ۳۱-جی گونو اونلار ایکینجی حاضیرلیق یاریشمالارینی کئچیرهجکلر. اسکوچیچین اویونچولاری، تورکییهنین سوپرلیگاسیندا چالیشان «گنجلر بیرلییی» آدیندا بیر تیمله گؤروشهجکلر. تراکتور ایلک حاضیرلیق یاریشماسیندا دؤرد قول ایله سیواساسپور تیمینی اودموشدور. اونلار ایکینجی یاریشمالاریندان سونرا اوردولارینین سونراکی آشاماسینی بولو شهرینده کئچیرهجکلر.
باش مشقچی: سرمربی
سون: آخر، پایان
اؤنجه: قبل
یئنی: جدید
قاپیچی: دروازهبان
یایینلاماق: پخش کردن
باشچی: رییس
بیلگی: آگاهی، اطلاعات
اوزمان: کارشناس
آنلاشما: تفاهم، توافق
سونوج: نتیجه
قول: گل
آشاما: مرحله
هر آخشام تورکجه ورزش اوخو (326)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)