تراکتورون قهرمانلیق سیرلری
یئنی فصله یاخینلاشارکن تراکتور تایسیز بیر شکیلده ثباتلی بیر باشگاها چئوریلمیش. کئچن فصللر بو زامانلار تراکتور فنیکادریندا، اداره بؤلومونده هابئله اویونچولارینین ترکیبینده دهییشیکلیک یاراتماقداایدی. آنجاق اونلار بو ایل فرقلی بیر سیاستله ایشلرینی قاباغا آپاریرلار. دراقانین اسکوچیچین سؤزلشمهسینی یئنیلهیهرک باشگاهین مودورلری باشاریلی بیر یولو داوام ائتمک اوچون آددیم آتمیشلار. زنوزی تیمین مودورلرینه دستک اولاراق باشگاهدا ثبات یاراتمیشدیر. اونلار اویونچولارین آراسیندا دا چوخ دهییشیکلیک یاراتماق ایستهمیرلر. دئییلنلره گؤره دؤرد یابانچی اویونچو تیمه قوشولاجاقلار. بو اولایلار پارلاق بیر گلهجکدن خبر وئریر، تراکتور آرتیق حاشییه و ثباتسیزلیقدان اوزاق گزن بیر تیمدیر.
بیرونون قارانلیق گونلری قورتاراجاق
علیرضا بیرانوندله پرسپولیس باشگاهینین شکایت پروندهسی سون ایللرده ایران فوتبالینین اَن چکیشمهلی اولایلاریندان ساییلیر. میللی رسانه حاشییه یاراتماقلا بیرانوندین محروم اولاجاغینی هامییا ایناندیرمیشدیر. آنجاق ایندی سوپرلیگا سونونا چاتمیشدیر. بیرانوند ده محروم اولمادان ایشینین باشیندادیر. تراکتور و پرسپولیس باشگاهلارینین مودورلری بو سورونو آرادان قالدیرماق اوچون دانیشیغا کئچمیشلر. اونلار بو مسئلهنی اؤز آرالاریندا حل ائدیب شکایتلرینی گئری آلماق ایستهییرلر. بیر سیرا قایناقلارین دئدیکلرینه گؤره بو دانیشیقلارین مثبت سونوجو اولموشدور. یوخاری احتمال ایله بیرانوندین پروندهسی محرومیت و جریمه حؤکمو وئریلمهدن باغلاناجاقدیر. بو اولایلار یئنی فصلین باشلانغیجیندا تراکتورچولاری سئویندیرهبیلر.
آسیا دئولرینین آغیر ساواشی
تراکتور آسیا داهیلر لیگاسینین قروپ آشاماسینی باشاریلا بیتیرمک اوچون حاضیرلیق آپارماقدادیر. اونلار ایران سوپرلیگاسینین قهرمانلیق عونوانینی قازاناراق آسیا یاریشمالارینا قاتیلماق سهمیهسینی اَلده ائتمیشلر. عرب اؤلکهلری یوخاری سرمایه ایله آسیا یاریشمالارینین دئولری ساییلیرلار. الهلال و السد باشگاهلاری دونیانین اَن یاخشی اویونچولارینی تیملرینه گتیرمک اوچون نئچه میلیارد دلارلار هزینه ائتمیشلر. اونلارلا یاریشماق گئرچکدن چتین ایشدیر. زنوزی ده یابانچی اؤلکهلردن بیر نئچه اویونچو آلماقلا تراکتورو گوجلندیرمک ایستهییر. ایلیک اولاراق تراکتور قروپ آشاماسیندان یوخاری آشامایا چاتماق اوچون چالیشمالیدیر. اونلار یولون داوامینا دا منطقله باخمالیدیرلار.
«امیر حسین بارسایا گئتملیدیر»
کئچن گون امیرحسین حسینزاده قارداشی ایله بیرلیکده «توپا» تؤرهنینه قاتیلمیشدیر. اونلار دونن بو مراسمین حاشییهسینده دیققت چکیجی سؤزلر دئمیشلر. امیرحسین:« بؤیوک قارداشلاریم منیم اَن بؤیوک انگیزهلریمدیرلر. اونلار دا فوتبال ساحهسینده چالیشمیشلار آنجاق منیم قدر شانسلی اولمامیشلار. قارداشیم مهدی بیرینجی سویه لیگادا پیکان تیمینده اوینامیشدیر. آنجاق او لاییق اولدوغونا چاتمادی. قارداشلاریملا بیر تیمده چالیشماق ایستهییردیم آنجاق اولمادی.»
مهدی حسینزاده، امیرحسینین قارداشی سؤزلرینین داوامیندا بئله دئمیش:« بیلیرم او گلهجکده دونیانین اَن یاخشی تیملرینه قوشولاجاقدیر. اونون بارسلونا و رئال کیمی تیملرده چالیشماغینی اومید ائدیرم.»
هر آخشام تورکجه ورزش اوخو (323)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)