قیزیل باشماقلی مهندیس تبریزده...
مهدی ترابی تراکتورون قهرمانلیق سورهجینده تیمین ترکیبینده اؤنملی رول اوینامیشدیر. او گلن فصل ده تراکتورون کؤینهیی ایله مئیدانا گئدهجکدیر. ترابی دوققوز قول پاسی وئرمکله سوپرلیگانین اَن یاخشی پاسورو ساییلیر. کئچن فصلین سورهجینده میللی رسانهلرین بیر سیراسی «ترابینین تبریزده افسرده اولماسی» ویاخود « ترابینین کئچیجی اویونچو اولاراق تراکتورا قوشولماسی» کیمی اساسسیز خبرلر یایینلاییردیرلار. آنجاق ترابی بو خبرلری اؤنمسهمهدن قهرمانلیق کورسوندا تراکتورا چوخ یاردیمجی اولموشدور. فصلین سونوندا رسانهلر ترابینین پرسپولیسه قاییتماق اوچون ماراقلی اولدوغونو دئییردیرلر. بونلارا باخمایاراق محمدرضا زنوزی بو اویونچو ایله دانیشاراق تیمده قالماق اوچون اونون گؤیلونو آلمیشدیر.
شجاعنین یوخلوغونون نهدنی؟!
ایرانین میللی تیمی اوچ-هئچه قوزئی کرهنین تیمینی اودموشدور. علیرضا بیرانوندله شجاع خلیلزادهنین یوخلوغو بو یاریشمانین دیققت چکیجی اولایلاریندانایدی. ایران کئچن یاریشمادا قطر تیمینه اودوزموشدور. چوخلاری بو ایکی اویونچونو تیمین باشاریسیزلیق نهدنی بیلمیشلر. شجاع خلیلزاده قیچ ناحییهسیندن یارالاندیغی اوچون دوننکی یاریشمانی اَلدن وئرمیشدیر. او اوزدن میللی تیمین ترکیبینده یوخایدی. او ایران-قطر یاریشماسینین بوتون دقیقهلرینده عارف آقاسینین یانیندا مئیداندا اوینامیشدیر. دوننکی یاریشمادا علی نعمتی آقاسینین یانیندا اونون یئرینه مئیدانا گئتمیشدیر. شجاع میللی تیمین ترکیبینده اَللی اویون اوینامیشدیر. او بئله بیر چتین دورومدا فصلی سونا چاتدیرمیشدیر.
تراکتور ایکی اولدوزونو ساخلاماق ایستهییر
تراکتور باشگاهی آلیش وئریش هفتهلرینده بو گونه قدهر جیددی بیر ایش گؤرمهمیش. آنجاق سون دانیشیقلاریندا تیمین ایکی اولدوزونون گؤیلونو گلن فصلی ده تراکتوردا قالماق اوچون آلمیشلار. کئچن هفتهلر مهدی هاشمینژاد ایله امیرحسین حسینزادهیه خاریجی اؤلکهلردن اؤنری گلمیشدیر. هاشمینژاد بو فصل تراکتوردا پاریلدامیشدیر. او فوتبالینی اماراتدا داوام ائتمک ایستهییردی. آنجاق تراکتور باشگاهی اونو تبریزده قالماق اوچون راضیلاشدیرمیشدیر. حسینزاده ده چوخ آچیق بیر شکیلده لژیونر اولماق ایستهدیینی بیلدیرمیشدیر. آنجاق تراکتور باشگاهی بو اویونچونون دا آیریلیغینا راضی اولمامیش. بو ایکی اویونچونون تراکتورلا اوچ ایل ده سؤزلشمهلری واردیر. آنجاق گلن فصللرده باشگاه اونلاری یاخشی بیر رقم قارشیلیغیندا باشقا تیملره ده وئرهبیلر.
حسینزاده دونیا کاپیندا پارلاماق ایستهییر
۲۰۲۶ دونیا کاپی یاریشمالارینین ایلکین آشامالاریندا دونن آخشام ایرانین میللی تیمی اوچ- هئچه قوزئی کرهنین تیمینی اودموشدور. امیرحسین حسینزاده یاریشمانین سون آنلاریندا اوچونجو دفعه اولاراق حریفین داروازاسین آچمیشدیر. حسینزاده فصلین ایلک گونلریندن تراکتوردا یاخشی سونوجلار قازانماغا باشلامیشدیر. آنجاق میللی تیمین فنی کادری اونو میللییه چاغیرماق ایستهمهمیشدیر. آنجاق حسینزادهنین یاخشی آمارلارینین داواملی اولماسی میللی تیمین قاپیلارینی اونون اوزونه آچمیشدیر. بیرینجی اوردولاردا اونون مئیدانا گئتمهسی اوچون فورصت تاپیلمیردی. آنجاق سون ایکی یاریشمادا تیمین تمل ترکیبینده مئیدانا گئتمیشدیر. او دوننکی یاریشمادا قول ووراراق بیر داها گوجونو هامییا گؤسترمیشدیر. او بو شکیلده پارلاماغا داوام ائتمکله دونیا کاپینین یاریشمالاریندا اؤنملی اویونچولارین آراسیندا اولابیلر.
هر آخشام تورکجه ورزش اوخو (322)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)