آقاسی ایستهدییینه چاتمادی!
کئچن فصل عارف آقاسی باشقا اویونچولارا گؤره داها چوخ دقیقهلر مئیداندا چالیشمیشدیر. او ایکی ایل باشگاهدا قالماق حاقیندا دانیشسا دا داها چوخ پول ایستهدییی اوچون یئنی سؤزلشمه یازابیلمهمیشدیر. ایندی ایسه ایلک دورومونا قاییتماق اوچون چالیشماقدادیر. بو اویونچو فصل بیتمهدن اؤنجه باشگاهین مودورلریله ایکی ایللیک بیر سؤزلشمه حاقدا آنلاشمیشدیر. آنجاق فصل سونا چاتدیقدان سونرا داها یوخاری رقم ایستهیهرک پرسپولیس، استقلال و سپاهان تیملریله دانیشماغا باشلامیشدیر. آنجاق اونون ایستهدییی رقمین یوخاری اولدوغو اوچون بو دانیشیقلار دا یاریمچیق قالمیشدیر. آقاسی تراکتوردان پئشین اؤدهمه آلدیغینی استقلالا دئمیشدیر. آنجاق استقلال باشگاهی بو حاقدا آراشدیرما آپاردیقدان سونرا اونون یالان دئدییینی آنلامیشدیر.
کیم تراکتوردان آیریلابیلر؟!
آلیش وئریش گونلرینده تراکتوردان آیریلماق احتمالی اولان اویونچو تومیسلاو اشترکالیدیر. اونون تیمدن آیریلماغی باشگاهین یئنی اویونچولار آلابیلمهسینه باغلیدیر. تراکتورون سوروملولاری بو پستدا چالیشابیلن یابانچی و یاخشی اویونچو تاپارلارسا اشترکالینین تراکتوردان آیریلماغی کسینلشهجکدیر. اشترکالین آدی هله ده تراکتورلا سؤزلشمهسی اولان اویونچولارین سیراسیندادیر. اونون سون دورومو آلیش وئریشلرین سونوجونا باغلیدیر. تراکتورون پلانی تیمین اسکلتینی قورویاراق مقصدلی دهییشیکلیکلر یاراتماقدیر.
اسکوچیچین باشی قاریشیقدیر
فصل بیتدیکدن سونرا عارف آقاسی فرقلی باشگاهلارلا دانیشیغا باشلامیشدیر. او یوخاری رقم ایستهدییی اوچون دراقان اسکوچیچ آقاسینین یئرینده دورابیلن یابانچی و اوجا بوی بیر اویونچونون پئشیندهدیر. اسکوچیچ کئچن فصل چوخ گوجلو بیر تیم باغلامیشدیر. ایندی ده ائشیکدن دفاع خطینده چالیشان اویونچو گتیرمکله تیمین بو خطینی گوجلندیرمک ایستهییر. اسکوچیچین سئچدییی یابانچی اویونچولار تراکتوردا یاخشی سونوجلار قازانمیشلار. دروژدکلا اشترکالی قول وورماقلا، پوستونسکی مئیدانین رهبرلیینی اَله آلاراق تراکتوردا پاریلدامیشلار. هوادارلار دا بو قونو دا دراقان اسکوچیچه اینانیرلار. اونلارین یئنی مدافعین گلمهسینی گؤزلهییرلر.
نادری؛ تراکتورلا سؤزلشمهم وار
محمد نادری تراکتورون سول دفاعسی کئچن فصل تراکتورون تمل ترکیبینده اؤزونه یئر آییرمیشدیر. او تراکتورون قهرمانلیغی حاقدا بئله دئمیش:« بیزیم تیمیمیز تایسیزایدی. بو قهرمانلیق تراکتورون هوادارلارینین حاقیایدی.» بو اویونچو سوپرلیگانین باشقا تیملریندن ده اؤنری آلمیشدیر. نادری بو مسئلهنی ده بئله دهیرلندیرمیش:« باشقا تیملردن اؤنریم اولسا دا تراکتورلا سؤزلشمهم واردیر. کئچن فصل بو تیمده یاخشی گونلری کئچیردیم. قیسمت اولارسا بو ایش بیرلییی داوام ائدهجک.»
او میللی تیمه چاغیریلماماسی حاقدا دا بئله دئمیش:« کئچن فصل منیم اوچون چوخ یاخشیایدی. تیمیمه یاردیمجی اولماق اوچون بوتون گوجومله مئیداندا چالیشدیم. میللی تیمه چاغیریلان اویونچولارین آراسیندا دا اولابیلردیم. دونیا کاپینین یاریشمالارینا قاتیلماق اوچون داها چوخ چالیشاجاغام.»
هر آخشام تورکجه ورزش اوخو (320)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)