یادگار استادیومونون سورونلاری
تراکتورون گلن فصل آسیا داهیلر لیگاسینا قاتیلدیغی اوچون یادگار استادیومونون دورومو دهییشمهلیدیر. اولوسلارآراسی سویهسینده یاریشمالارا میزبانلیق ائتمک اوچون بعضی استانداردلار قورونمالیدیر. تراکتورون هوادارلاری سون ایللرده هر زامان یادگارین چمنینین پیس دورومونا اعتراض ائتمیشلر. بو ایل قهرمانلیق تؤرهنینه قاتیلان هوادارلارین بیر نئچهسی ائولرینه دؤنرکن جانلارینی الدن وئرمیشلر. بو مسئله سوروملولار اوچون بؤیوک بیر اویاریدیر. او اوزدن یادگار استادیومونا چاتان یوللار تعمیر اولونمالیدیر. آسیا فوتبال کنفدراسیونونون شرطلریندن بیری بیلیتلرین ساتیلیشی ایله استادیوم صندللرینین ساییسینین برابر اولماسیدیر. یادگارین ایکینجی قاتیندا صندل یوخدور. بیرینجی قاتین صندللری ده یاخشی دورومدا دئییل. بوفه و سو ایچمک اوچون دوزگون بیر یئرین اولماماسی دا استادیومون باشقا سورونلارینداندیر.
قاراباغ ایله تراکتورون گؤروشو
قاراباغ فوتبال تیمی آذربایجان جمهوریتیندن اؤز رسمی صفحهسینده تراکتورلا گؤروشمک ایستهدیینی بیلدیرمیشدیر. طاهیر گؤزل، قاراباغ باشگاهینین مودورو، بو ایکی باشگاهین آراسیندا کولتورل و ورزشی ایلگیلرین قورولماسی اوچون ماراغلی اولدوغونو وورغولامیشدیر. او بو گؤروشمه حاقدا بئله دئمیش:« بو گؤزل و دهیرلی گؤروشمه بیزیم اوچون سئوینج وئریجیدیر. بوتون گوجوموزله بو یاریشمانی کئچیرمک اوچون حاضیریق. ایکی باشگاهین آراسیندا بو گؤروشمه اوچون اویغون بیر واختین سئچیلمهسی چوخ یاخشی اولاجاقدیر. ایران فوتبال فدراسیونو بو ایشده بیزیمله امکداشلیق ائدهرسه مینتدار اولاجاغیق. بیز سایغی و سئوگی ایله باکیدا حؤرمتلی قوناقلاریمیزی قارشیلایاجاغیق.»
خداداد - یحیی؛ «سیزدن اؤیرنمیشم»
خداداد عزیزی، تراکتور باشگاهینین مودورو، اویون مئیدانین قیراغیندا باش وئرن اولاری انتقاد ائتمیشدیر. هابئله یحیی گلمحمدینین سؤزلرینه تپکی گؤسترمیشدیر. عزیزی بو قونو حاقدا بئله دئمیش:« تیمین حقلرینی قوروماق اوچون مئیدانین قیراغیندا بیر نفرین های کوی سالماسینا گرک واردیرسا بو سورونو فوتبال ساحهسینده چالیشان اؤز یولداشلاریمیز یاراتمیشلار. یحیی گلمحمدی بیر یاریشمادان سونرا فدراسیوندان، مئیدانین قیراغیندا دایاناراق قیشقیران بیر شخصین اولماسینی ایستهمیشدیر. بو سؤز منیم حاقیمدا دئییلیبسه، بو ایشلری اونلارین اؤزوندن اؤیرهندییمی وورغولامالییام. من یاخشی بیر اؤیرنجییم. من درسلریمی یاخشی آلیرام. سیز ایللر بویو مئیدانین قیراغیندا هایکوی سالاراق قهرمانلیق عونوانینی قازاندینیز. حاکیم یانلیش بیر حرکت ائتدییی زامان مئیدانا گیریب اونون سینهسینه دؤیموشسوز. بو صحنهلرین ویدیوسو دا واردیر.»
هر آخشام تورکجه ورزش اوخو (319)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)