اورمییه ۱۴۰۴؛ قورخونج تیمدن خبر یوخ!
شهرداری اورمییهنین بؤیوک وارلیقلاریندان بیری هوادارلاریدیر. اونلار کئچن فصل بو مسئلهنی هامییا گؤسترمیشلر. تماشاچیلار بوتون یاریشمالاردا استادیوما گلمکله تیملرینه دستک اولموشلار. فصلین سونوندا شهردارینین بودجهسینین چوخالماسی حاقدا خبرلر یایینلانمیشدیر. آنجاق اونلار آلیش وئریش گونلرینده کئچن ایللره گؤره دهییشیک بیر ایشلر گؤرمهمیشلر. شهرداری اورمییه والیبالین باهالی اولدوزلارینی آلابیلمهمیشدیر. او اوزدن بو ایلین سونوجلاری اویونچولارین غیرتی، اونلارین انگیزهسی و فنیکاردین دوشونجهلرینه باغلیدیر. آنجاق هوادارلارین تیمدن باشقا گؤزلنتیلری وارایدی. اونلار شهداب یزد و فولاد سیرجان کیمی گوجلو دئولرین قاباغیندا دایانابیلن بیر تیمین باغلانماسینی گؤزلهییردیلر.
پورحمیدی تراکتورلا ویداعلاشدی
حسین پورحمیدی کئچن ایکی فصلده تراکتور اوچون چالیشدیقدان سونرا خیبرخرمآباد تیمیله رسمی سؤزلشمه یازمیشدیر. بو تجروبهلی قاپیچی استقلال و آلومینیوم تیملرینده ده چالیشمیشدیر. خیبر خرمآباد محمد ربیعینین رهبرلییی ایله گلن فصلی چوخ باشلاماق ایستهییر. او اوزدن بیرینجی اولاراق داروازالارینی قوروماق اوچون پورحمیدیله سؤزلشمیشلر. بو قاپیچینین خیبره قوشولماسی اونلار اوچون چوخ فایدالی اولابیلر. پورحمیدی تراکتورا قوشولدوغو ایلک فصلده بو تیمده یاخشی سونوجلار قازانمیشدیر. آنجاق ایکینجی فصلده علیرضا بیرانوندین تراکتورا قوشولدوغو اوچون بو قاپیچی نیمکتده اوتورماق مجبوریتینده قالمیشدیر.
سونگونون مودورونون میلیاردلیق بورجو
مسسونگون باشگاهینین اداره بؤلومونده باش وئرن دهییشیکلیکلردن بیر نئچه هفته سونرا یئنی بؤحرانلار اوزه چیخماقدادیر. اَلده ائتدییمیز بیلگیلره گؤره باشگاهین یئنی اکیپه تاپشیریلدیغی گوندن بری ۶۰ میلیاردلیق بورجو واردیر. بو مسئله یئنی مودورون قارشیسیندا اولان اساس سورونلارداندیر. بو مسئلهنین داها قورخونج یؤنلری ده واردیر. بو قدر بورجلا کئچن ایکی فصلده باشگاه یاخشی سونوجلار قازانمامیشدیر. سونگونون فوتسال تیمی ایکی فصلدیر کاپ آلابیلمهمیش. والیبال تیمی ده ایکی ایلدیر سوپرلیگایا گئدهبیلمهمیش. سونگونون فوتبال تیمی کئچن ایکی فصلده آشاغی لیگه یئنمک تهلوکهسی ایله اوزبهاوز اولموشدور. باشگاهین باشقا تیملری ده داغیلمیشدیر.
هر آخشام تورکجه ورزش اوخو (318)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)