تراکتورون مارکتده ایکی اؤنملی مسئلهسی
تراکتور باشگاهی اولدوزلارینین سؤزلشمهسی یئنیلسه ده اونلارین قارشیسیندا ایکی اؤنملی مسئله واردیر. علیرضا بیرانوندین تراکتورلا سؤزلشمهسی اولسا دا حسین پورحمیدینین تراکتوردان آیریلدیغی اوچون ایکینجی قاپیچینین یئری نیمکتده بوشدور. بیرانوندین محروم اولاجاغی حاقدا دا شایعهلر یایینلانمیش. او اوزدن اونون یئرینه گوجلو بیر قاپیچی تیمه قوشولمالیدیر. ایکینجی مسئله عارف آقاسی حاقدادیر. بو اویونچونون گلهجهیی هله ده بللی دئییل. او کئچمیشده تراکتوردا قالماق ایستهدیینی بللی ائتسه ده ایندی باشقا باشگاهلارلا دانیشیق آپارماقدادیر. ایندی تراکتور ایکی ایشه مووازی شکلیده باخمالیدیر: آقاسینین سؤزلشمهسینی یئنیلمک ویاخود اونون یئرینه باشقا اویونچو گتیرمک. بو ایکی مسئلهنی حل ائتمک گلن فصلده تراکتورون گلهجهیینی ائتکیلهیه بیلر.
یئددی باشگاهین مجوزین AFC تأیید ائتدی
آسیا فوتبال کنفدراسیونو(AFC)، حرفهای مجوز آلان تیملرین لیستهسینی یایینلامیشدیر. اونلارین آراسیندا یئددی ایرانلی تیمین آدی گؤرونور. AFCنین بیلدیریسینه گؤره آلومینیوم اراک، استقلال تهران، فولاد خوزستان، فولاد مبارکه سپاهان، گلگهر سیرجان، پرسپولیس و تراکتور تیملری آسیا یاریشمالارینا قاتیلماق اوچون رسمی مجوز آلمیشلار. بو لیستهده قطر و اوزبکیستان اؤلکهلری ۱۸ و ۱۷ تیمله اَن چوخ مجوز آلان اؤلکهلردیرلر.
حاکیملرین یانلیشلاریندان فایدالانان تیملر
حاکیملرین کئچن فصلدهکی یانلیشلارینین جدولی یایینلانمیشدیر. بو جدول یایینلاندیقدان سونرا استقلالین هوادارلاری بو مسئلهیه سانال اورتامدا چوخ پیس تپکیلر گؤسترمیشلر. بو جدوله گؤره استقلال تیمی بو یانلیشلیقلارندان چوخ فایدالانمیشدیر. آنجاق اوزمانلارین بیر سیراسی پرسپولیس و استقلال تیملرینین بیر اندازهده بو یانلیشلاردان فایدالاندیغینا اینانیرلار. استقلالچیلار بو مسئلهدن ضرر گؤردوکلرینه اینانیرلار. سوپرلیگانین یئنی فصلینده VAR ایله حاکیملرین قضاوتی حاقدا چوخ چاتیشمالار اولموشدور. بو سورونلارین گلن فصلده ده داواملی اولاجاغی ظن ائدیلیر. بو جدوله گؤره تراکتور حاکیملرین یانلیشلاریندان دولایی ضرر ده گؤرموشدور. اَن چوخ فایدالانان تیم فولاد خوزستاندیر.
یادگارین چمنی تورکییهدن گلهجک
یادگار استادیومونون چمنینی دهییشمک حاقدا یئنی بیلگیلر اوزه چیخمیش. علیرضا منادی، تبریز نومایندهسی و حبیب مقصودیفر، دوغوآذربایجانین گنجلر و ورزش مودورو بو حاقدا تئلفون واسیطهسی ایله دانیشمیشلار. آنلاشمالارا گؤره محمدرضا زنوزی، تراکتور باشگاهینین یییهسی یئنی چمنین هزینهسین اؤدهیهجک. بو پروژهنین ایشلری گنجلر و ورزش ادراهسینین نظارتی آلتیندا اولاجاق. تیرین ۱۵-جی گونونه قدر کهنه چمنی گؤتوروب تورپاغی یئنی چمن اوچون حاضیرلاماق سورهجی بیتهجکدیر. پژوهنین اَن اؤنملی یئری تورکییهدن یئنی چمن گتیرمکدیر. دوشنبه گونو حبیب مقصودی، محمدرضا زنوزیله یئنی چمن آلماق ایشلرینی بیترمک اوچون تورکییهیه گئدهجک.
هر آخشام تورکجه ورزش اوخو (316)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)