آسیا دئولری VS تراکتور
تراکتور ایران سوپرلیگاسیندا قهرمانلیق عونوانینی قازاناراق آسیا داهیلر لیگاسینین سهمیهسینی قازانمیشدیر. بو یاریشمالاردا قهرمان اولماق اؤلکه لیگینده قهرمان اولماقلا تام فرقلیدیر. کئچمیشده فوتبال دونیاسینین یوخاری یاشلی اویونچولارینی عرب تیملر و دوغو آسیانین تیملرینده گؤرمک اولاردی. آنجاق ایندی اونلار دونیانین اَن یاخشی اویونچولارینی میلیاردلیق سرمایه ایله تیملرینه گتیرمیشلر. اؤزللیکله عربستان تیملری بو ایشلریله آسیا یاریشمالارینین سویهسینی دهییشمیشلر. اونلار آسیا فوتبالینی اَللرینده دولاندیریرلار. محمدرضا زنوزی ده بو یاریشمالار اوچون اؤزل پلانلا قاباغا گئتملیدیر. زنوزی دونیا سویهسینده تانینان فوتبال اولدوزلارینی تیمه گتیرملیدیر.
تورکییهلی چرخ سورن تبریزده اؤلدو
اولوسلارآراسی ایران-آذربایجان چرخسورمک تورونون ۳۷-جی دؤورو خرداد آیینین ۶-جی گونوندن ۱۰-جو گونونهدک دوغو آذربایجان، باتی آذربایجان و اردبیلده کئچیریلمیشدیر. آنجاق بیر هفته یاریشمالاردان سونرا تورکییهلی قاتیلمجینین اؤلومو چوخلارینی اوزموشدور. بو یاریشمالار یابانچی قاتیلمجیلارلا فنی باخیمدان چوخ یوخاری سویهده کئچیریلسه ده بو آجی اولایلا سونا چاتمیشدیر. مصطفی آیورکان، تورکییهنین توتواسپور تیمیندن یاریشما سورهجینده عراقلی قاتیلمجینین چرخی ایله توققوشاراق قضا یاراتمیشدیر. ایلک اولاراق سراب سونرا دا تبریزین خستهخاناسینا آپاریلمیشدیر. حکیملرین چاباسینا رغمن بو قاتیلمجی بئینینه دهین ضربهدن دولایی اولموشدور.
آنا اسکوچیچین دوغوم گونو
تراکتور دراقان اسکوچیچین رهبرلییی ایله ایران سوپرلیگاسینین قهرمانلیغینی قازانمیشدیر. اسکوچیچ گوجلو و انرژیلی بیر تیم باغلایاراق حریفلرینین قارشیسیندا دایانماغی باجارمیشدیر. بو تاریخی قهرمانلیق آذربایجان اوچون چوخ اؤنملیایدی. اسکوچیچ بو پارلاق سونوجلا اؤز یئتهنکلرینی هامییا گؤسترمیشدیر. ایندی ایسه دراقان اسکوچیچ آذربایجاندا چوخ سئویلیر. او قیزینین دوغوم گونونو فرقلی شکیلده قوتلامیشدیر. اونلارین دوغوم گونو قوتلامالارینین شکیلی سانال اورتامدا یایینلانمیشدیر. آنا، دراقان اسکوچیچین قیزی، دوغوم گونونون قوتلاماسیندا تراکتورون کؤینهیینی گئیمیشدیر. هابئله آنانین دوغوم گونونون کیکینده تراکتورون لوگوسو گؤرونور.
پورحمیدی خیبر خرمآبادا قوشولاجاق
حسین پورحمیدی، تراکتورلا قهرمان اولدوقدان سونرا بو باشگاهدان آیریلمیشدیر. او سؤزلشمهسینی بیر طرفلی اولاراق پوزموشدور. پورحمیدی سونراکی باشگاهی ایله چوخ تئز آنلاشمیشدیر. یوخاری احتماللا خیبر خرمآباد تیمینه قوشولاجاقدیر. بو ۲۷ یاشلی قاپیچی آلومینیوم اراکدا چوخ یاخشی سونوجلار قازانمیشدیر. اوچ فصل آلومینیومدا چالیشدیقدان سونرا تراکتورا قوشولموشدور. ایکی فصل ده تراکتور اوچون چالیشمیشدیر. گلن فصل ایسه خیبر خرمآبادین داروازاسین قورویاجاقدیر. یاخین زاماندا پورحمیدی بو تیمله رسمی سؤزلشمه یازاجاقدیر. بو قاپیچی تراکتورا قوشولدوغو ایلک فصلده سوپرلیگانین هر ۳۰ هفتهسینده مئیدانا گئتمیشدیر. ۱۸ کلینشیت ده اؤز آدینا یازمیشدیر. آنجاق علیرضا بیرانوند تراکتورا قوشولدوقدان سونرا نیمکتده اوتورماق مجبوریتینده قالمیشدیر.
هر آخشام تورکجه ورزش اوخو (315)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزلهیین
نظرات (0)