سعید معروف مس‌سونگونه قوشولاجاق
ورزش آذربایجان خبر وئریر، یاخین زامان‌دا سعید معروف، میللی والیبال تیمی‌نین اَسکی اولدوزو، مس‌سونگون باشگاهی ایله سؤزلشمه یازاجاق‌دیر. اَلده ائتدییمیز یئنی بیلگی‌لره گؤره بو سؤزلشمه‌نین تاماملانماسی اوچون تکجه بیر امضا قالمیش‌دیر. دئییلن‌لره گؤره معروف سون دانیشیق‌لار اوچون تبریزه گله‌جک‌دیر. بو دانیشیق‌لاردان سونرا سونگونون سوپرلیگه قوشولدوغو ایلک فصل‌ده بو تیمین رهبرلیینی اَله آلاجاق‌دیر. مس‌سونگون والیبال فدراسیونو ایله دانیشیق آپاردیقدان سونرا سوپرلیگ سهمیه‌سین قازانمیش‌دیر. اونلار بیرینجی دفعه اولاراق اؤلکه‌نین اَن یوخاری سویه‌‌لی لیگاسیندا یاریشاجاق‌لار.
اسکوچیچین لیسته‌سینده کیم‌لر وار؟!
ورزش آذربایجان خبر وئریر، دراقان اسکوچیچ سؤزلشمه‌سینی تراکتورلا یئنی‌له‌دیکدن سونرا محمدرضا زنوزی، تراکتور باشگاهی‌نین یییه‌سی ایله بیرلیکده آلیش-وئریش لیسته‌سینی حاضیرلاماق‌دادیرلار. اعتبارلی قایناق‌لاردان بیزه چاتان خبرلره گؤره اسکوچیچ ایلک اولاراق تیمین دفاع خطینی گوجلندیرمک ایسته‌ییر. او بو خط اوچون یابانچی( عومومیتله اوروپالی) اویونچولارین آدینی باشگاهین اداره بؤلومونه وئرمیش. عارف غلامی‌له عارف آقاسی‌نین دورومو هله ده بللی دئییل. اسکوچیچ رسمی شکیلده غلامی‌نین آیریلیغی حاقدا هئچ بیر بیلگی وئرمه‌میش. هابئله آقاسی‌نین سؤزلشمه‌سینی یئنی‌لمک حاقدا دا اؤز توتومونو بللی ائتمه‌میش. وورغولامالییق خبرلره گؤره آقاسی آرتیق تراکتوردان آیریلماق ایسته‌میر. اسکوچیچین لیسته‌سینده کروات اویونچولارین دا آدی گؤرونور.
شجاع‌نین ۵۰-جی میللی اویونو
ورزش آذربایجان خبر وئریر، شجاع خلیل‌زاده ۳۶ یاشیندا اولسا دا قاتیلدیغی یاریشمالاردا تام حاضیرلیقلی اولموش‌دور. او تراکتورون کاپیتانی اولاراق قهرمانلیق کاپینی اَلده ائتمیش‌دیر. هابئله اَن یوخاری کلین‌شیتی اؤز آدینا یازاراق اؤلکه‌نین اَن یاخشی دفاع اویونچولاریندان ساییلیر. سوپرلیگ یاریشمالاریندان سونرا میللی تیمه چاغیریلمیش‌دیر. شجاع میللی تیمین دائمی دفاع اویونچوسودور. بو اویونچو قطر و کره‌شمالی‌نین قارشیسیندا مئیدانا گئتمک‌له میللی اویون‌لارینین سایی‌سین اَللی‌یه چاتدیراجاق. اؤلکه‌نین فوتبال تاریخینده بوگونه قدر ۴۹ اویونچو میللی تیمله، ۵۰ اویون مئیدانا گئتمیش. کارلوس کئیروش دؤنه‌مینده خلیل‌زاده یئددی ایل میللی تیمدن اوزاق قالمیش‌دیر. یوخسا بو گونه قدر اونون میللی اویون‌لارینین سایی ۱۰۰ رقمی‌نی ده آشمیش اولاردی.
پرسپولیسین کاپیتانی تبریزده!
ورزش آذربایجان خبر وئریر، وحید امیری، رسمی اولاراق پرسپولیس باشگاهیندان آیریلمیش‌دیر. بو تجروبه‌لی اویونچو ایل‌لر بویو باش‌کندین قیزمیزلاری‌لا چالیشدیقدان سونرا ایندی باشقا باشگاه‌لاردا چالیشمالی‌دیر. پرسپولیس باشگاهی بو خبری یایینلان‌دیقدان سونرا امیری سوپرلیگانین بؤیوک باشگاه‌لاری‌لا دانیشماغا باشلامیش‌دیر. خبرلره گؤره اونون‌لا تراکتورون دانیشیق‌لاری سون آشاماسینا چاتمیش‌دیر. یایینلانان بیلگی‌لره گؤره امیری ایله تراکتور آنلاشمیش‌لار. بو اویونچو گلن گون‌لرده تبریزده تراکتور باشگاهی ایله سؤزلشمه یازاجاق‌دیر. بو سؤزلشمه‌نین تاماملانماسی یئنی فصل‌‌ین های‌کوی‌لو اولای‌لاریندان اولابیلر.
هر آخشام تورکجه ورزش اوخو (312)
هر آخشام تورکجه ورزش اوخو؛ آذربایجانین ان اؤنملی ورزش خبرلرینی هر آخشام ورزش آذربایجان آخاغیندان ایزله‌یین
نظرات (0)