ورزش آذربایجان خبر وئریر، شهرداری اورمییه والیبال تیمی کئچن فصل سوپرلیگانین قهرمانلیغینا چوخ یاخین‌لاشمیش‌دیر. آنجاق کئچن ایل‌لره تای کاپی الده ائده بیلمه‌میش‌لر. بئله بیر دوروم‌دا تیمین هوادارلاری قهرمانلیق سویه‌سینده تیم‌لرینه دستک اولموش‌‌لار. اونلار دوغرودان دا تا‌ی‌سیزایدیلار. باشقا تیم‌لرین شهرداری اورمییه کیمی هوادارلاری یوخ‌ایدی. دورنالارین هوادارلاری تراکتورچولارا تای ائوده کئچیریلن یاریشمالاردا هابئله ائودن اوزاق اویون‌لاردا تیم‌لرینی یالنیز بوراخمامیش‌‌لار.
اداره بؤلومو حاقدا نیگران‌چیلیق
آنجاق قارشی طرف‌ده شهرداری اورمییه‌نین مودورلری هوادارلارین حدینده بیر ایش گؤرمه‌میش‌لر. او اوزدن بو قونو دا نیگران‌چیلیق‌لار یارانمیش‌دیر. شهرداری سوپرلیگانین یاریم فینال آشاماسیندا فولاد سیرجانا اودوزدوقدان سونرا هوادارلارین آراسیندا دراماتیک و اوزوجو صحنه‌لر یارانمیش‌دیر. تیم اودوزدوقدان سونرا دا اونلار ۴۵ دقیقه تیم‌لرینی آلقیشلامیش‌لار.
هوادارلارین تای‌سیز دسته‌یی و سوروملولارا قارشی اینجیک‌لیک
ورزش ساحه‌سینده بو تای‌سیز صحنه‌لری یاراتماق یانیندا شهرداری هوادارلارینین سوروملولاردان ایستک‌لری ده اولموش‌دور. بو ایستک‌لر ورزش آذربایجان خبر آژانسین‌دان دا یایینلانمیش‌دیر. اورمییه‌نین والیبال سئورلری سون نفس‌لرینه قده‌ر تیم‌لرینین آراخاسیندا اولاجاق‌لارینی بیلدیرمیش‌لر. اونلار تیمین اؤیه‌لرینه تشککور ائتمیش‌لر. هابئله اویونچولارلا تیمین فنی کادرینا دستک اولموش‌‌لار.
اینجیک‌لیک‌لر: سوروملولارین ده‌ییشیم‌سیز سؤزلری
شهرداری اورمییه‌نین هوادارلاری بؤلگه‌نین سوروملولاریندان گلن فصل اوچون قهرمانلیق حدینده بیر تیم باغلاماق ایسته‌میش‌لر. اونلار ایل‌لر بؤیو شهرداری‌‌نین قهرمانلیق حسرتینی سینه‌لرینده داشیمیش‌لار. ایندی ایسه سوروملولار، هوادارلار و بؤلگه‌نین والیبال سئور شخص‌لرینه اولان بورج‌لارینی اؤده‌ملی‌دیرلر. شهرداری اورمییه‌نین هوادارلاری هر ایل قهرمانلیق رؤیاسی ایله سالونا گلیرلر آنجاق سونون‌دا حسرت چکیرلر.
شهرداری مودورلرینین توتومو ده‌ییشه‌جک‌می؟
باشگاهین سون دورومو و مودورلرین بو باشگاها اولان باخیش‌لارینا گؤره کئچن ایل‌لره تای یاخشی بیر سونوج اؤلکه‌نین والیبال باش‌کندینی گؤزله‌میر. بو بؤلگه‌ده اولان بؤیوک پتانسیل‌لردن دولایی اورمییه‌نین سوروملولاری اؤز توتوم‌لارینی ده‌ییشه‌جک‌لرمی؟ مودورلرین قارشیسیندا اولان اَن یاخشی یول فولاد سیرجانا اودوزدوقدان سونرا هوادارلارین آغلار گؤزلریندن چکیلن ویدیولار باخیب گوجلو بیر ایش باشلاماق اوچون انگیزه آلماق‌دیر.
نظرات (0)